स्वबळावर लढण्याचे ध्येय ठेवा ()

नागपूर : आगामी काळात नागपूर महापालिकेच्या निवडणुका आहेत. त्यामुळे प्रत्येक वॉर्डात बूथ पातळीवर संघटन बळ‌कट करा. मागे पक्षाला लाजीरवाणा पराभव पत्कारावा लागला आहे, याची आठवण करून देत यावेळी ताकदीने काम करून संघटन उभारा. प्रसंगी स्वबळावर लढण्याचे ध्येय ठेवा, असे प्रोत्साहन देत राष्ट्रवादीचे प्रदेश अध्यक्ष व जलसंपदा मंत्री जयंत पाटील यांनी अप्रत्यक्षपणे काँग्रेसवर दबाव निर्माण केला.

राष्ट्रवादी परिवार संवाद दौऱ्यानिमित्त जयंत पाटील यांनी सोमवारी नागपुरातील जैन कलार समाज भवनात नागपूर शहर व ग्रामीण कार्यकारिणीची आढावा बैठक घेतली. यावेळी गृहमंत्री अनिल देशमुख, माजी मंत्री रमेश बंग प्रामुख्याने उपस्थित होते. यानंतर नागपूर शहरातील पूर्व, पश्चिम व उत्तर नागपूर विधानसभा मतदारसंघाचा आढावा घेतला. त्यांनी प्रमुख पदाधिकाऱ्यांची मतेही जाणून घेतली. राज्यात महाविकास आघाडी असली तरी नागपुरात राष्ट्रवादीला सोबत घेऊ नये, अशी भूमिका शहर काँग्रेसच्या पदाधिकाऱ्यांनी घेतली आहे. याला उत्तर देण्यासाठी स्वत:चे संघटन अधिक बळकट करण्यावर जयंत पाटील यांनी आढावा बैठकीत भर दिला. तुम्ही मेहनत करा, आम्ही मदतीला तयार आहोत. पक्ष वाढवा, पुढे काय होईल ते पाहू, असे प्रोत्साहन देत काँग्रेसला सूचक इशाराही त्यांनी दिला. मंगळवारी मध्य, दक्षिण व दक्षिण नागपूर या तीन मतदारसंघांचा आढावा घेतला जाणार आहे. बैठकीला राष्ट्रवादी अल्पसंख्याक सेल राष्ट्रीय अध्यक्ष शब्बीर विद्रोही, माजी आ.प्रकाश गजभिये, राजेंद्र जैन, दिनानाथ पडोळे, शहराध्यक्ष अनिल अहिरकर, सलील देशमुख, विदर्भ दौरा समन्वयक प्रवीण कुंटे पाटील, महिला प्रदेशाध्यक्षा रुपाली चाकणकर, युवक प्रदेशाध्यक्ष मेहबूब शेख, कार्याध्यक्ष रविकांत वर्पे, युवती प्रदेशाध्यक्ष सक्षणा सलगर, विद्यार्थी प्रदेशाध्यक्ष सुनील गव्हाणे, ओबीसी सेलचे प्रदेशाध्यक्ष ईश्वर बाळबुधे, अल्पसंख्याक सेलचे कार्याध्यक्ष जावेद हबीब, प्रवक्ते श्रीकांत शिवरकर, राजेंद्र बढिये आणि पक्षाचे इतर प्रमुख पदाधिकारी उपस्थित होते.