नागपूर : अल्पवयीन मुलगी आंघोळ करीत असताना वस्तीत राहणाºया आरोपीने ती आंघोळ करीत असताना चित्रफित तयार करून तिचा विनयभंग केला. ही घटना कपिलनगर पोलिस ठाण्याच्या हद्दीत गुरुवारी दुपारी १२.३० वाजताच्या सुमारास घडली असून पोलिसांनी आरोपीला अटक केली आहे.
सॅमवेल पिटर चाको (२८, कपिलनगर) असे अटक करण्यात आलेल्या आरोपीचे नाव आहे. तो खासगी वाहनावर चालक म्हणून कामाला आहे. तर पिडीत १७ वर्षाची मुलगी शिक्षण घेत आहे. आरोपी पिडीत मुलीच्या वस्तीत राहतो. गुरुवारी दुपारी १२.३० वाजताच्या सुमारास पिडीत अल्पवयीन मुलगी आंघोळीला गेली होती. आरोपी ती आंघोळ करीत असताना चित्रफीत तयार करीत होता. ही बाब आंघोळ करीत असलेल्या पिडीत मुलीच्या लक्षात आली. लगेच तिने आपल्या कुटुंबीयांना याबाबत माहिती दिली.
चित्रफित तयार करून आरोपीने पिडीत अल्पवयीन मुलीच्या मनास लज्जा वाटेल असे कृत्य करून तिचा विनयभंग केला. पिडीत अल्पवयीन मुलीने दिलेल्या तक्रारीवरून कपिलनगरचे सहायक पोलिस निरीक्षक राजेंद्र यादव यांनी आरोपीविरुद्ध भादंविच्या कलम ३५४ (क), सहकलम १२ पोक्सोनुसार गुन्हा दाखल करून त्यास अटक केली आहे. पुढील तपास कपिलनगर पोलिस करीत आहेत. वेळीच अल्पवयीन मुलीच्या लक्षात ही घटना आल्यामुळे अनर्थ टळला आहे, अन्यथा आरोपीकडून ती आंघोळ करतानाची चित्रफीत व्हायरल करण्याची दाट शक्यता होती.