नरेश डोंगरेनागपूर : आयसीसी विश्व चषकाच्या फायनल मॅचवर बुकीबाजारात तब्बल ६५ ते ७० हजार कोटींचा सट्टा लागला होता, अशी धक्कादायक माहिती संबंधित सूत्रांकडून मिळाली आहे. क्रिकेट सट्टेबाजीच्या इतिहासात एका सामन्यावर एवढ्या प्रचंड रकमेचा सट्टा पहिल्यांदाच लागला होता. बुकीबाजारातील हा एक नवाच विक्रम असल्याचेही बुकी बाजारातील सूत्रांनी सांगितले आहे.
गुजरातच्या अहमदाबादमधील नरेंद्र मोदी स्टेडिअममध्ये देश-विदेशातील १ लाख, ३२ हजार क्रिकेट रसिकांच्या साक्षीने रविवारी १९ नोव्हेंबरला विश्वचषकाची फायनल मॅच खेळली गेली. या मॅचमध्ये भारतीय संघ कांगारूची शिकार करणार की कांगारू शिकारी ठरणार, असा उत्कंठावर्धक प्रश्न क्रिकेट विश्वाला पडला होता. मात्र, आंतरराष्ट्रीय बुकी बाजाराने विश्वविजेता म्हणून भारतीय संघाकडेच बोट दाखविले होते. पहिली इंनिंग सुरू असताना भारतीय संघाला एक रुपयाच्या बदल्यात ४६ पैसे तर ऑस्ट्रेलियाला ४८ पैसे भाव होता. अर्थात भारत जिंकणार म्हणून बुकीकडे कुणी एक हजार रुपये लावत असेल तर भारतीय संघ जिंकल्यास त्याला केवळ ४६० रुपये मिळणार, याऊलट ऑस्ट्रेलिया जिंकण्याचा दावा करणाऱ्यांना ४८० रुपये लावले तर १ हजार रुपये मिळणार. मात्र, जस-जसा सामन्यातील रोमांच वाढला तसतसे भाव कमी जास्त होत गेले. दुबई आणि बँकाँकमधून संचलित होणाऱ्या बुकीबाजारात मध्य भारतातील नागपूर, इंदोर, भोपाळ, जबलपूर, रायपूर आणि या सेंटरशी कनेक्ट असलेल गोवा, मुंबई हे सर्व सेंटर मॅच अखेरपर्यंत चांगलेच तापून होते, असेही सुत्रांनी सांगितले.
दोन्ही इनिंगमध्ये अनेकदा 'कलर'
मॅचमध्ये जेव्हा अनपेक्षित घडामोडी घडतात आणि बुकींचे अंदाज चुकतात तेव्हा त्याला बुकींच्या भाषेत कलर येणे म्हणतात. या मॅचच्या दोन्ही इनिंगमध्येही अनेकदा कलर आले. या सामन्यात पहिली खेळी करणारा संघ किमान २५० रन बनवेल असा बुकींचा अंदाज होता. त्यामुळे २५० ते ३३० धावांसाठी ३० पैसे भाव देण्यात आला होता. मात्र तो चुकला, हेच काय ३०० ते ३५० धावांसाठी ४५ पैसे, ३५० ते ४०० धावा ६० पैसे आणि ४०० पेक्षा जास्त धावांवर ८० पैसे भाव देण्यात आला होता. मात्र, हे सगळेच अंदाज चुकले. भारत केवळ २४० धावांवरच थांबला. त्यानंतर ऑस्ट्रेलियाच्या पहिल्या दोन विकेट जाताच पुन्हा सट्टाबाजारात कलर आला. भावांतही उलटफेर झाले.
हाैसेपोटी लावला सट्टा
विश्वचषकाच्या सामन्यात कांगारूची शिकार होणार की कांगारू शिकारी ठरणार, यावर ठिकठिकाणी जोरदार चर्चा झाली. विशेष म्हणजे, ज्यांनी आजपर्यंत कधीच सट्टा लावला नाही अशा असंख्य नवख्यांनीही आपापल्या मित्रांच्या माध्यमातून छोट्या छोट्या रकमेचा सट्टा लावला. काहींनी आपल्या मित्रांसोबत पैशांची पैज लावली तर काहींनी 'पार्टी'च्या रुपातही विश्वचषकाच्या सामन्यावर 'भारतीय संघ'च जिंकेल म्हणून पैज लावली होती.
घरी जमविलेल्या बैठकांमध्येही पैज
दिवाळीच्या निमित्ताने घरची मंडळी किंवा भाऊबिजेच्या निमित्ताने पत्नी बाहेर गेल्याची संधी साधून अनेकांनी आपल्या मित्रमंडळींना घरीच बोलवून घेतले. त्यांनी छान घरच्या टीव्हीवर मित्रांसोबत 'साग्रसंगीत मैफल (खाणे-पिणे करत) जमविली. अर्थात या बैठकांमध्ये मित्रामित्रांनी पैज लावली होती. तर, काही सोसायट्यांमध्ये क्रिकेट प्रेमींनी स्क्रिन लावून समोसे-मिरची आणि 'शितपेयाचे कॅरेट' सोबतीला ठेवून या ऐतिहासिक क्रिकेट मॅचचा आनंद लुटला.