६ शिक्षक, वर्ग ५ ते १० अन् विद्यार्थी २

नागपूर : एकीकडे जिल्हा परिषदेच्या शाळांमध्ये शिक्षकांची पदे रिक्त असताना, जिल्हा परिषदेच्या पटवर्धन हायस्कूलमध्ये ६ शिक्षक आणि २ विद्यार्थी अशी अवस्था आहे. २०१८ पासून या शाळांची अशीच अवस्था असून, ही बाब आता उघडकीस आल्यानंतर त्या शिक्षकांचे तडकाफडकी इतर शाळेत समायोजन करण्याचा निर्णय शिक्षण विभागाने घेतला आहे.

पटवर्धन हायस्कूल ही वर्ग ५ ते १२ पर्यंतची शाळा आहे. या शाळेच्या आस्थापनेवर कनिष्ठ व्याख्याता २, उच्च श्रेणी सहा. शिक्षक ४, निम्न श्रेणी सहायक शिक्षक १, शिक्षकेतर कर्मचारी ३, तांत्रिक विभागाचे ४ कर्मचारी व २ अपंग समावेशित माध्यमिक विशेष शिक्षिका असे एकूण १६ शिक्षक व शिक्षकेतर कर्मचारी आहेत. या शाळेतील ५ ते १० पटावर केवळ २ विद्यार्थी आहेत. जिल्हा परिषदेची पटवर्धन हायस्कूल ही शहरात आहे. त्यामुळे शिक्षण विभागाने या शाळेतील विद्यार्थी आणि शिक्षकांचेही समायोजन करण्याचा निर्णय घेतला आहे. येथील २ विद्यार्थ्यांचे नजीकच्या शाळेत समायोजन केल्यास ९ शिक्षक आणि शिक्षकेतर कर्मचारी अतिरिक्त ठरतात. त्यामुळे या शिक्षकांचे जिल्हा परिषदेतील माध्यमिक शाळेतील रिक्त पदांवर समायोजन करण्याचा निर्णय शिक्षण विभागाने घेतला आहे.

याचसोबत काटोल रोडवरील जिल्हा परिषद हायस्कूलमध्ये ८ पदे मान्य असून, १७ शिक्षक कार्यरत आहेत. जि.प. हायस्कूल जवळी येथे ६ शिक्षक मान्य असून, ८ पदे कार्यरत आहेत. जि.प. हायस्कूल पाचगाव, बोथिया पालोरा, हिंगणा, मांढळ, कोंदामेंढी या शाळांमध्ये मान्य पदांपेक्षा कार्यरत पदांची संख्या जास्त आहे.

- जिल्हा परिषदेच्या १४ शाळांचा आढावा घेतला असता, येथे १०४ शिक्षकांचे पद मान्य आहे, तर १२१ शिक्षक अतिरिक्त आहेत. जिल्हा परिषदेच्या माध्यमिक शाळांमध्ये गणित व विज्ञान विषयाच्या ३५ शिक्षकांची गरज आहे. त्यापैकी २५ शिक्षक कार्यरत आहेत. त्यामुळे गणित आणि विज्ञान शिक्षकांना आम्ही प्राधान्य देणार आहोत. १७ पैकी १४ शिक्षकांचे समायोजन करणार आहोत.

भारती पाटील, सभापती, जि.प. शिक्षण समिती