नागपूर :नागपूरच्या डॉ.बाबासाहेब आंबेडकर आंतरराष्ट्रीय विमानतळावर दुबईतून चक्क हातोड्यातून सोन्याची तस्करी झाल्याची घटना समोर आली आहे. नागपूर विमानतळावरून तीन तरुणांना अटक करण्यात आली असून त्यांच्याजवळील लोखंडी हातोड्याच्या आत ३३७ ग्रॅम सोने आढळले. हे तिघेही आरोपी नागौरचे रहिवासी आहेत. दोन दिवसांअगोदर गणेशपेठेत दुबईहून आलेले आयफोन्स, ॲपल वॉच लुटण्यात आल्याचे वृत्त ‘लोकमत’ने प्रकाशित केले होते. त्याचाच तपास करत असताना गणेशपेठ पोलिसांनी हे रॅकेट उघडकीस आणले.
पाच सप्टेंबर रोजी सकाळी सहा वाजता राजस्थानमधील नागोर जिल्ह्यातील मोहम्मद अली ऊर्फ जहांगीर खान उमर (३४) यांना दुबई येथील मित्र मोहम्मद ऊर्फ मोती खान याचा फोन आला. त्याने पाठविलेल्या सामानाची बॅग एका व्यक्तीकडून विमानतळाहून घेतली. त्यात सहा लाख किमतीचे आयफोन, ॲपल वॉच, रोलॅक्स वॉच आदी सामान होते. उमरला सकाळी सहा वाजता कारमधून आलेल्या दोघांनी लुटले. यासंदर्भात गणेशपेठ पोलीस ठाण्यात गुन्हा दाखल करण्यात आला.
या प्रकरणाचा तपास करण्यासाठी गणेशपेठ पोलिसांचे पथक विमातळावर पाहणी करत होते. त्यावेळी त्यांना तीन जणांचा संशय आला. त्यांचा चौकशीसाठी ताब्यात घेतले असता बॅगेत दोन हातोडे, स्टेपलरच्या पिन्स आणि ब्लँकेट सापडले. ते उडवाउडवीची उत्तरे देत होते. त्यांच्या जवळील दुबईला मजुरीसाठी जाण्यास सांगितले. हातोडा, सुटे भाग यांची माहिती त्यांना देता आली नाही. पोलिसांनी सराफा व्यापाऱ्याकडे हातोडा तपासासाठी पाठवला. हातोडा लोखंडाचा असला तरी दुबईहून केवळ दोन हातोडे आणि सुटे भाग पाठवल्याची बाब पोलिसांना पचनी पडली नाही. हातोडा फोडला तेव्हा त्यात लपविलेले सोने बाहेर आले. यानंतर तिघांनाही अटक करण्यात आली.
अक्रम मलिक दिन मोहम्मद (३२, नागौर, राजस्थान), इर्शाद इसाक खान (२१, नागौर, राजस्थान) आणि राहुल हरिश्चंद्र यादव (२४, आझमगड, यूपी) अशी अटक करण्यात आलेल्या आरोपींची नावे आहेत. सूत्रांनी दिलेल्या माहितीनुसार, तिन्ही आरोपी दुबईमध्ये कार्यरत असलेल्या सोन्याच्या तस्करांच्या सांगण्यावरून 'कुरिअर मेन' म्हणून काम करत होते. पाच सप्टेंबर रोजी जहांगीर खान उमरला नेमके कुणी लुटले हे स्पष्ट झालेले नाही. मात्र त्याच्याकडे दुबईहून आलेले सामान असल्याची टीप या तिघांनीच दिल्याचा पोलिसांना संशय आहे.