१४६३ ग्राहकांवर ३०.२८ कोटीचे वीज बिल थकीत

ग्राहक श्रेणी थकबाकी (कोटी रुपयात)

घरगुती २४७.३५ कोटी

वाणिज्यिक ४९.७९ कोटी

औद्योगिक २८.५ कोटी

लोकमत न्यूज नेटवर्क

नागपूर : महावितरणच्या शहर सर्कलमध्ये तबल्ल १४६३ वीज ग्राहक असे आहेत ज्यांच्याकडे एक लाखापेक्षा अधिक रकमेचे वीज बिल थकीत आहे. केवळ याच ग्राहकांचा विचार केला तर त्यांच्यावर एकूण ३० कोटी २८ लाख रुपयाची थकबाकी आहे. या थकबाकीदारांकडून वसुली करण्यासाठी महावितरणने या ग्राहकांवर लक्ष केंद्रित केले आहे. थकीत वीज न भरणाऱ्या ५०० ग्राहकांचे कनेक्शन दररोज कापले जात आहेत.

नागपूर शहर सर्कमध्ये ८१,३८९ ग्राहकांनी एप्रिल २०२० पासून वीज बिल भरणे बंद केले आहे. सर्कलमध्ये एकूण वीज बिलाची थकबाकी १६९.९० कोटी इतकी आहे. यात एक लाख रुपयापेक्षा अधिकची थकबाकी असलेल्या ग्राहकांची संख्या १४६३ इतकी आहे. एप्रिल २०२० पासून बिल न भरणाऱ्यांवर १६९.९० कोटीची थकबाकी आहे. परंतु एकूण थकबाकी ३२५.१९ कोटी रुपये आहे. यात एप्रिल २० पूर्वीपासून आणि डिसेंबर २० नंतरची थकबाकीचाही समावेश आहे.

महावितरणनुसार यापैकी बहुतांश ग्राहकांची आर्थिक परिस्थिती चांगली आहे. कोविड-१९ च्या प्रादुर्भावामुळे राज्य सरकारने कोरोना काळातील वीज बिलापासून दिलासा देण्याची घोषणा केली होती. दिलासा मिळेल या अपेक्षेने बहुतांश ग्राहकांनी वीज बिल भरणेच बंद केले. दुसरीकडे राज्य सरकारने ३१ डिसेंबरपर्यंतच थकबाकीदारांना अभय देण्याचा निर्णय घेतला. आता बिल न भरणाऱ्यांचे वीज कनेक्शन कापले जात आहे.

बॉक्स

सर्वाधिक लखपती थकबाकीदार सिव्हील लाईन्समध्ये

शहरात सर्वाधिक लखपती वीज थकबाकीदार सिव्हील लाईन्स डिव्हिजनमध्ये आहेत. येथे ६५२ थकबाकीदार आहेत ज्यांच्यावर १४.३२ कोटी रुपये थकीत आहेत. या श्रेणीत सर्वात कमी १९ ग्राहक एमआयडीसी डिव्हिजन(बुटीबोरी-हिंगणा)मध्ये आहेत. त्यांच्यावर २८.३७ कोटी रुपयाची थकबाकी आहे. त्याचप्रकारे काँग्रेसनगर डिव्हिजनमध्ये ४९ ग्राहकांवर १.१४ कोटी, गांधीबागमध्ये २८० ग्राहकांवर ५.१२ कोटी व महाल येथील ४६३ ग्राहकांवर ९.४० कोटीचे वीज बिल थकीत आहे.

बॉक्स

घरगुती ग्राहक सर्वाधिक

एक लाख व त्यापेक्षा अधिकचे बहुतांश वीज थकबाकीदार घरगुती श्रेणीमधील आहेत. हिंगणा व बुटीबोरीसारख्या औद्योगिक क्षेत्रात अशा ग्राहकांची संख्या केवळ १९ आहे. यातून हे दिसून येते की, कारखान्यांनी आपले वीज बिल थकीत ठेवलेले नाही. दुसरीकडे ज्या डिव्हिजनमध्ये अधिक थकबाकी आहे, तिथे घरगुती कनेक्शनची संख्या अधिक आहे.

.

बॉक्स

मोठ्या थकबाकीदारांवर अगोदर कारवाई

महावितरणची आर्थिक परिस्थिती पाहता थकबाकीदारांकडून वसुली करण्यास प्राधान्य दिले जात आहे. एक लाख किंवा त्यापेक्षा अधिक रक्कम थकीत असलेल्यांचे वीज बिल अगोदर कापले जात आहे. या सर्वांना नोटीस देऊन १५ दिवसाची मुदत देण्यात आलेली आहे.

अमित परांजपे, अधीक्षक अभियंता, महावितरण