वाघांच्या अवयवातील तस्करीत पुन्हा ३ आरोपींची भर

नागपूर : बुटीबोरी वनपरिक्षेत्रात ९ सप्टेबरला केलेल्या वाघांच्या अवयवाच्या तस्करींच्या आरोपींमध्ये पुन्हा तिघांची भर पडली आहे. त्यामुळे या प्रकरणातील आरोपींची संख्या आता ६ वर पोहचली आहे.

९ सप्टेबरला बोरखेडी टोल नाका येथे सापळा रचून वन विभागाच्या अधिकाऱ्यांनी वाघाच्या १३ मिशा आणि ६ नखांसह पोंभूर्ण तालुक्यातील (केमारा, जि. चंद्रपूर) येथील योगेश लालश्याम तोडासे, रामचंद्र तुकाराम बावणे आणि श्रीराम लक्ष्मण पोरेते यांना ताब्यात घेतले होते. त्यांची चौकशी केल्यावर या तस्करीमध्ये नव्याने नावे समोर आली. त्यामुळे वन विभागाच्या पथकाने केमारा येथे जाऊन पुन्हा तिघांना ताब्यात घेतले. श्रीदास बळीराम कडते, प्रभाकार बाबाजी तोडासे, मुरलीधर केशव नैताम अशी त्यांची नावे आहेत. त्यांच्या घराची झडती घेऊन वाघाला पुरलेल्या ठिकाणची तपासणी केली. यावेळी त्यांच्याकडे वाघाची हाडे ५.६०० किलोग्रॅम, नखे १६ , वाघाच्या मिशा ४२, खवल्या मांजरीचे खवले, वाघाच्या हाडाचे तुकडे १३५ ग्रॅम, दोन भाले व तार बंडल असे साहित्य सापडले. ते जप्त करून शनिवारी त्यांना न्यायदंडाधिकाऱ्यांसमोर हजर केले. या सर्वांना १४ सप्टेबरपर्यंत वन कोठडी सुनावण्यात आली आहे.