लोकमत न्यूज नेटवर्क
नागपूर : जनरलचे तिकिट घेऊन स्लिपरमध्ये प्रवास करणाऱ्या तसेच कोणतेही तिकिट नसताना बिनधास्त रेल्वेगाडीत प्रवास करणाऱ्या १९३३ प्रवाशांना मध्य रेल्वेच्या चेकिंग स्टाफने गुरुवारी पकडले. त्यांना कारवाईचा दणका देऊन त्यांच्याकडून दंडापोटी तब्बल साडेबारा लाख रुपये वसूल करण्यात आले.
बेशिस्त तसेच विनातिकिट प्रवाशांना वठणीवर आणण्यासाठी रेल्वेकडून वेळोवेळी कारवाईची विशेष मोहिम राबविण्यात येते. गुरुवारी १९ जुनला अशाच प्रकारे धडक कारवाईसाठी ८० तिकिट तपासणीस, ४ आरपीएफ कर्मचारी तसेच २ वाणिज्य निरीक्षकांवर जबाबदारी सोपविण्यात आली. त्यांनी वेगवेगळ्या मार्गावर धावणाऱ्या २२ रेल्वे गाड्यांमध्ये अचानक चढून तिकिट तपासणीची मोहिम राबविली. त्यात त्यांना तब्बल १९३३ प्रवासी आढळले. त्यांच्यापैकी अनेकांकडे तिकिटच नव्हते. तर काही जणांकडे जनरलचे तिकिट असूनही ते स्लिपर किंवा एसी कोचमध्ये बसून प्रवास करीत होते. या सर्वांना दंडाचा दणका देत त्यांच्याकडून १२ लाख, ५६ हजार, ६५० रुपये वसूल करण्यात आले.
या गाड्यांमध्ये झाली तपासणी
उपरोक्त तपासणी पथकाने नागपूरसह वर्धा, बल्लारशाह, आमला आणि बैतूल रेल्वे स्थानकावरून धावणाऱ्या ट्रेन नंबर १२७२१ दक्षिण सुपरफास्ट एक्सप्रेस, ट्रेन नंबर १२२९६ संघमित्रा एक्सप्रेस आणि ट्रेन नंबर १६०३१ अंदमान एक्सप्रेसमध्ये ही विशेष तपासणी मोहिम राबविली. ज्यात सर्वाधिक रितेश सेवनिया यांनी ६० जणांना पकडून ३५ हजार रुपये, ४८ विनातिकिट प्रवासी पकडून चिंटू कुमार यांनी ४३८३० रुपये, तर आलोक झा यांनी ४० जणांना पकडून ३१, ९५० रुपये दंड वसूल केला.