मास्क न घालणाऱ्या १२७ जणांना दंड

नागपूर : नागपूर महानगरपालिकेच्या एनडीएस पथकाने गुरुवारी मास्क न घालता सार्वजनिक स्थळांवर फिरणाऱ्या १२७ नागरिकांवर कारवाई केली. या नागरिकांकडून ५०० रुपये या प्रमाणे दंड वसूल करण्यात आला. एनडीएस पथकाने ६३ हजार ५०० रुपये दंड वसूल केला आहे. उल्लेखनीय म्हणजे दंड आकारलेल्या नागरिकांना महापालिकेच्यावतीने यावेळी मास्कचे वितरण करण्यात आले.

लॉकडाऊननंतर मास्क घालण्याच्या नियमानुसार एनडीएस पथकाने एकूण ३०४५१ नागरिकांवर कारवाई करून १ कोटी ३५ लाख ८४ हजार ५०० रुपये दंड वसूल केला आहे. कोरोनाच्या रुग्णांची संख्या पूर्वीपेक्षा कमी झाली असली तरी जाणकारांच्या मते आताही सार्वजनिक स्थळांवर फिरताना सुरक्षित अंतर आणि मास्क घालणे आवश्यक आहे. गुरुवारी महापालिकेच्या ए़नडीएस पथकाने लक्ष्मीनगर झोन अंतर्गत २५, धरमपेठ झोनमधील १८, हनुमाननगर झोनमधील १८, धंतोली झोनमधील ६, नेहरुनगर झोनमधील २, गांधीबाग झोनमधील ५, सतरंजीपुरा झोनमधील ४, लकडगंज झोनमधील ७, आशीनगर झोनमधील १९, मंगळवारी झोनमधील २१ आणि महापालिका मुख्यालयात २ नागरिकांविरुद्ध कारवाई केली.

..............