सेलू तहसीलच्या खात्यातून काढली रक्कम : शेतकर्‍यांना मदतीच्या धनादेश क्रमांकाचा गैरवापर वर्धा : सेलू तहसील कार्यालयाकडे असलेल्या बॅक ऑफ इंडियाच्या धनादेश पुस्तिकेचा क्रमांक मिळवून त्याच क्रमांकाच्या बनावट चेक बुकचा आधार घेत तीन धनादेशाच्या माध्यमातून सेलू तहसीलच्या बँक खात्यातून नरेश सी. चैनानी या नावाने तब्बल ११ लाख ९0 हजार ७६0 रुपयांची परस्पर उचल केल्याची खळबळजनक माहिती पुढे आली आहे. सदर धनादेश हे सेलू येथील बँक ऑफ इंडियाच्या शाखेतून न वटविता ते थेट याच बँकेच्या धुळे येथील शाखेतून वटविण्यात आले. सेलू तहसीलकडे लोकल क्लिअरन्स चेक बुक आहे. मात्र वटलेले धनादेश हे मल्टीसिटी क्लिअरन्सचे असल्याची बाब स्कॅन कॉपीवरुन पुढे आली आहे. याचाच फायदा नरेश चैनानी याने घेतल्याचे समजते. सदर धनादेशाचे क्निअरन्स सेलूच्या बँक ऑफ इंडियातून न करता ते देखील धुळे येथीलच एचडीएफसी बँकेतून झाल्याची बाब तहसीलदार प्रियदर्शिनी बोरकर यांनी सहकार्‍यांसह केलेल्या सखोल चौकशीत उघड झाल्याचे समजते. तीन धनादेश न वटल्यामुळे सेलू तहसील कार्यालयाचे १७ लाख ७१ हजार ९६0 रुपये बचावले आहे. लखनौचा पत्ता असलेला एक इसम बँक ऑफ इंडियाकडून सेलू तहसील कार्यालयाला आधीच इश्यू झालेल्या क्रमांकाचे चेक बुक मिळवितो. ज्या क्रमांकाच्या धनादेशाच्या आधारे शेतकर्‍यांना नुकसान भरपाईपोटी मदत दिली त्याच क्रमांकाच्या आधारे दुसरे मोठय़ा रकमेचे धनादेश वटवितो, यावरुन या व्यवहारात मोठी लिंक असल्याचा संशय आहे. बँक ऑफ इंडियाची धुळे शाखाही संशयाच्या भोवर्‍यात आहे. (जिल्हा प्रतिनिधी)
बनावट धनादेशाद्वारे १२ लाखांची उचल
By admin | Updated: May 28, 2014 00:54 IST