सेमी इंग्रजीच्या १०० शाळांना मंजुरी

पालकांचा कल सेमी इंग्रजी व इंग्रजी माध्यमाच्या शाळांकडे असल्याने जिल्हा परिषदेच्या शाळांतील विद्यार्थ्यांची पटसंख्या दरवर्षी कमी होते आहे. याला आळा घालण्यासाठी शाळा

जिल्हा परिषद : पटसंख्या वाढविण्याचा प्रयत्न

नागपूर : पालकांचा कल सेमी इंग्रजी व इंग्रजी माध्यमाच्या शाळांकडे असल्याने जिल्हा परिषदेच्या शाळांतील विद्यार्थ्यांची पटसंख्या दरवर्षी कमी होते आहे. याला आळा घालण्यासाठी शाळा व्यवस्थापन समितीच्या मागणीनुसार सेमी इंग्रजी व इंग्रजी माध्यमाच्या शाळांना मंजुरी देण्याचे धोरण शिक्षण विभागाने स्वीकारले आहे. त्यानुसार जिल्ह्यात सेमी इंग्रजीच्या १०० शाळांना मंजुरी दिल्याची माहिती शिक्षण सभापती वंदना पाल यांनी सोमवारी दिली. २६ जूनला जि.प.च्या शाळा सुरू होत आहेत. शाळेच्या पहिल्या दिवशी विद्यार्थ्यांना गणवेश व पाठ्यपुस्तके वाटप करण्याचे निर्देश शिक्षण समितीच्या बैठकीत देण्यात आले. त्यादृष्टीने शिक्षण विभागाने नियोजन केले आहे. शिक्षण समितीवर शिक्षक संघटनेच्या एका पदाधिकार्‍याची नियुक्ती करावयाची आहे. परंतु जि.प. शिक्षकांच्या विविध संघटना असल्याने ज्या संघटनेचे सर्वाधिक सदस्य असतील, अशा संघटनेच्या पदाधिकार्‍याची समितीवर सदस्य म्हणून नियुक्ती केली जाणार आहे. ० ते १० पटसंख्येच्या शाळा बंद करण्याचे शासनाचे धोरण आहे. परंतु आरटीईनुसार सरकारनेच मोफत शिक्षणाचा अधिकार दिला आहे. कमी पटसंख्येच्या कारणावरून शाळा बंद केल्या तर विद्यार्थ्यांचा शिक्षणाचा अधिकार हिरावला जाणार असल्याने यावर फेरविचार व्हावा, असे मत वंदना पाल यांनी व्यक्त केले. हिंगणा येथे जि.प.ची डिफेन्स उच्च प्राथमिक शाळा आहे. हिंदी माध्यमाच्या या शाळेत प्रामुख्याने डवलामेटी परिसरातील विद्यार्थी आहेत. विद्यार्थ्यांच्या सोयीसाठी ही शाळा डवलामेटी येथे स्थलांतरित करण्याचा निर्णय समितीने घेतला. सभेच्या मंजुरीनंतर यावर पुढील कार्यवाही केली जाणार आहे. जि.प. शाळांमध्ये संगणक व किमती साहित्य आहे. सुरक्षेसाठी सुरक्षा रक्षक नियुक्त करण्याची सदस्यांनी मागणी केली. हा विषय मंजुरीसाठी सभेकडे पाठविण्याची सूचना पाल यांनी केली. बैठकीला शोभा झाडे, सुधाकर ढोणे, शांता कुमरे यांच्यासह शिक्षण विभागातील अधिकारी सहभागी होते. (प्रतिनिधी)