१०० टक्के लसीकरण करणाऱ्या नगरसेवकाला १० लाखाचा पुरस्कार ()

लोकमत न्यूज नेटवर्क

नागपूर : महानगरपालिकेच्या अंतर्गत असलेल्या वाॅर्डात संपूर्ण लसीकरणाचे लक्ष्य पूर्ण करणाऱ्या नगरसेवकाला कार्यासाठी अतिरिक्त १० लाख रुपयांचा पुरस्कार देण्याची घोषणा राज्याचे ऊर्जामंत्री तथा जिल्ह्याचे पालकमंत्री नितीन राऊत यांनी सोमवारी केली.

प्रभावती ओझा स्मृती सेवा संस्था, नाग विदर्भ चेंबर ऑफ कॉमर्स, विदर्भ टॅक्स पेअर असोसिएशन यांच्या संयुक्त विद्यमाने रामदासपेठ येथील एका हॉटेलमध्ये आयोजित चर्चासत्रात ते बोलत होते. महसूल मंत्री बाळासाहेब थोरात हे ऑनलाईन सहभागी झाले होते. पालकमंत्री म्हणाले, राज्य शासन असो वा जिल्हा प्रशासन सर्वोच्च प्राथमिकता सामान्य माणसाच्या जीवाची काळजी घेणे आहे. व्यापारी, उद्योजक, व्यावसायिकांच्या अडचणी लक्षात घेऊनच लॉकडाऊन व निर्बंधासंदर्भात निर्णय घेण्यात आला. संभाव्य तिसऱ्या लाटेसाठी प्रशासन पूर्णपणे सज्ज आहे.

२०० ॲम्ब्युलन्सचे वाटप करण्यात आले आहे. मेडिकल, मेयो, एम्स येथे पीएससी प्लांट उभारणे अंतिम टप्प्यात आहे. पीएम केअरमधून मेडिकलमध्ये आणि कामठीमध्ये प्लांट उभारणे प्रगतिपथावर आहे. सध्या ३,२२६ बेड उपलब्ध आहेत. कॉल सेंटर सुरू करण्यात आल्याचे त्यांनी सांगितले.

यावेळी जिल्हाधिकारी विमला आर. यांच्यासोबत विदर्भ टॅक्स पेअर असोसिएशनचे श्रवण कुमार मालू यांनी, पोलीस आयुक्त अमितेश कुमार यांच्यासोबत तेजिंदर सिंग रेणू यांनी तर नाग विदर्भ चेंबर ऑफ कॉमर्सचे अश्विन मेहाडिया यांनी मनपा आयुक्त राधाकृष्णन बी. यांच्यासोबत व्यापार, उद्योग समूहातील विविध अडचणींबाबत स्वतंत्रपणे चर्चा केली.

यावेळी विदर्भ इंडस्ट्रीज असोसिएशनचे अध्यक्ष सुरेश राठी, बुटीबोरी मॅन्युफॅक्चरर्स असोसिएशनचे प्रदीप खंडेलवाल, एमआयएचे अध्यक्ष सी. जी. शेगावकर, वेदचे अध्यक्ष शिवकुमार राव, विश्वजित भगत, मनोहर बुद्धेश्वर, हरीश भोनेज, गिरीश गांधी, प्रफुल्ल गुडधे पाटील आदी उपस्थित होते. संचालन रामकिसन ओझा यांनी केले. रामावतार तोतला यांनी आभार मानले.