- रवींद्र राऊळ भिवंडीनजीकचे ते गाव सारेजण पडघा म्हणून ओळखत असले तरी काही जणांसाठी ते आहे अल-शाम. म्हणजे चक्क ग्रेटर सिरियाचा भाग. तरुणांना दहशतवादाचे प्रशिक्षण देणारी भारतातील इसिसची राजधानी. अल-शाम या अरबी शब्दाचा अर्थ सिरिया, जॉर्डन, लेबनॉन, पॅलेस्टाइन, तुर्की हा टापू मिळून होणारे खलिफाचे राज्य आणि पडघा म्हणजे त्या अंतर्गत येणारी भारतातील इसिसची स्वतंत्र राजधानी घोषित झाली. जिचा भारताशी काहीच संबंध नाही. तिथे भारताचे कायदे नाहीत तर चालतो फक्त शरीयत ए अल शाम कायदा.
२७ मार्च २००३ची ती रात्र मुंबई पोलिसांचे एन्काउंटर स्पेशलिस्ट अधिकारी कधीच विसरणार नाहीत. साकीब नाचन दहशतवादी कृत्यांमध्ये सहभागी असल्याची माहिती मिळाल्याने पोलिस पडघ्यात पोहोचले. साकीब नाचणला घराबाहेर काढेपर्यंत अख्खा गाव एकवटला. त्यांनी ज्या आक्रमकतेने पोलिसांना अडवले, घोषणाबाजी, शिवीगाळ करत हल्ला केला ते पाहून पोलिसही हबकले आणि कसाबसा तेथून काढता पाय घेतला.
दोन दिवसांनी मुंबई पोलिसांनी गोरेगाव हायवेवर दोन पाकिस्तानी आणि एक काश्मिरी अशा लष्कर-ए-तोयबाच्या तिघा सशस्त्र अतिरेक्यांना चकमकीत ठार केले तेव्हा त्यांच्या डायरीत साकीब नाचनच्या बॉम्बस्फोटातील सहभागाचा उल्लेख आढळला. याच अतिरेक्यांनी २००२-२००३ मध्ये मुंबई सेंट्रल, विलेपार्ले, मुलुंड आणि घाटकोपर येथे लोकलमध्ये बॉम्बस्फोट घडवण्यासाठी पाकिस्तानातून स्फोटके आणली होती. पोलिसांनी पुन्हा साकीब नाचनच्या अटकेसाठी पिच्छा पुरवला तेव्हा त्याने शरणागती पत्करली. नाचणने बॉम्बस्फोटातील सहभागाची कबुली देत घराजवळील विहिरीतून शस्त्रे काढून दिली.
साकीब नाचनच्या कारवाया जुन्याच आहेत. १९८०च्या सुमारास सिमी संघटनेत ताे पदाधिकारी हाेता. १९९० मध्ये पाकिस्तानला भेटी देत भारतीय मुस्लिम तरुणांना स्फोटके आणि गनिमी युद्धाचे प्रशिक्षण देण्याची जबाबदारी स्वीकारली. पाकिस्तानमधील शीख तरुणांना प्रशिक्षणही दिले. अतिरेक्यांसाठी भारतात सुविधा निर्माण करण्याच्या इसिसच्या कटात तो सहभागी होता. गुजरात सीमेवरून तस्करी केलेली शस्त्रास्त्रे सुरक्षित जागी लपवणे हे त्याचे मुख्य काम होते.
१९९२ मध्ये नाचनला अहमदाबादमध्ये खलिस्तानी अतिरेकी लाल सिंग याच्यासह टाडाअंतर्गत दोषी ठरवण्यात आले. शिक्षा भोगून २००१ मध्ये नाचन पडघा येथे परतला आणि दोन वकिलांसह तिघांचे खून केल्याच्या प्रकरणात अडकला, परंतु निर्दोष सुटला. दरम्यान, दहा ते बारा तरुणांचे ब्रेन वॉश करून त्यांना त्याने दहशतवादी प्रशिक्षणासाठी इराक आणि सिरिया येथे पाठवले होते.
२०२३ मध्ये एनआयएने पडघ्यात छापा घातला तेव्हा तेथे सापडले ते पॅलेस्टाइनचे झेंडे, जाळण्यासाठी इस्रायलचेही झेंडे, ४० ड्रोन, शस्त्रसाठा, रोख ६८ लाख रुपये आणि इसिसचे प्रशिक्षण साहित्य. याच ४० ड्रोनच्या साहाय्याने मुंबईवर हल्ला करण्याची तयारी सुरू होती. मुलगा शामिलसह साकीबला अटक करण्यात आली. अगदी परवाच पडघा येथे एटीएसने छापा घातला तेव्हाही त्याचे साथीदार पहलगाम दहशवादी हल्ल्यानंतर मुंबईवर हल्ला करण्याची तयारी करत होते.
कधी रशियाविरुद्ध लढणारा युक्रेन, कधी इस्रायलविरोधात लढणारा पॅलेस्टाइन तर कधी तुर्की, सिरिया हे कट्टरपंथी देश नाचणचे प्रेरणास्थान. हमासचे आतंकवादी त्याचे आयडॉल. भारताशी युद्ध पुकारून इसिसची राजवट आणायचे हे त्याचे स्वप्न.
ते पूर्ण करण्यासाठी तुरुंगातून बाहेर पडताच तो हिरिरीने पुन्हा कामाला लागतो. पोलिस त्याला गजाआड करण्यासाठी जीवाचे रान करतात. पण देशद्रोहाचे गंभीर आरोप वारंवार होत असतानाही देशाचे कायदे त्याला तुरुंगात ठेवू शकत नाहीत. उलट चांगल्या वर्तणुकीसाठी शिक्षेत पाच महिन्यांची सवलत मिळून तो आधीच कसा सुटतो, याचे आश्चर्य पोलिसांना वाटत राहाते.
लोकल बॉम्बस्फोट प्रकरणात त्याला शिक्षा झाली. २०१७ मध्ये सुटका झाल्यानंतर तो पडघा येथे परतला. तोवर सिमीवर बंदी आल्याने तो इसिस मॉड्युलसाठी काम करू लागला. इसिसच्या या राजधानीत देशभरातून येणाऱ्या तरुणांना दहशतवादी प्रशिक्षण देण्याआधी बया म्हणजे वफादारीची शपथही दिली जाते. म्हणूनच पडघा बदनाम बस्ती मानली जाते.