महाराष्ट्र सरकार उभारणार योगा विद्यापीठ

योगविद्येच्या प्रसारात महत्त्वाची भूमिका बजावू शकणा-या आणि योगाचे प्रमाणिकरण करू शकणा-या महत्त्वाकांक्षी योगा विद्यापीठाचा पाया महाराष्ट्रात रचला जाईल अशी चिन्हे आहेत

ऑनलाइन लोकमत

मुंबई, दि. २० - योगविद्येच्या प्रसारात महत्त्वाची भूमिका बजावू शकणा-या आणि योगाचे प्रमाणिकरण करू शकणा-या महत्त्वाकांक्षी योगा विद्यापीठाचा पाया महाराष्ट्रात रचला जाईल अशी चिन्हे आहेत. त्यामुळे जसं टेनिससाठी विम्बल्डन आहे, क्रिकेटसाठी लॉर्ड्स आहे त्याप्रमाणे योगासाठी महाराष्ट्र असेल अशी भूमिका राज्य सरकार घेत आहे. सध्या वेगवेगळ्या संस्था योगा शिकवतात त्यांना एका छत्राखाली आणणे, प्रमाणिकरण करणे आणि सगळ्या शाखांमध्ये समन्वय साधणे या विद्यापीठाच्या माध्यमातून शक्य होईल अशी ही संकल्पना आहे.

जगाने योगा स्वीकारला असताना मध्यवर्ती संस्थेची गरज असल्याचे सांगत या विद्यापीठासाठी महाराष्ट्र पुढाकार घेईल असे शालेय शिक्षण मंत्री विनोद तावडे यांचे सहाय्यक श्रीपाद ढेकणे यांनी सांगितले.

तावडे यांनी योगशिक्षण देणा-या राज्यातल्या सगळ्या प्रमुख संस्थांना एकत्र येण्याचे निमंत्रण दिले असून समन्वयाचे काम या क्षेत्रातले तज्ज्ञ उदय देशपांडे करत आहेत. येत्या काही दिवसांमध्ये जागा व विद्यापीठाचे स्वरुप याबाबत चर्चा करण्यात येईल असे देशपांडे म्हणाले. आंतरराष्ट्रीय योगा डे च्या तयारीचे काम सुरू असताना विद्यापीठाची संकल्पना पुढे आल्याचे देशपांडे म्हणाले.

विद्यापीठ झाल्यावर सरकामान्य पदविका, डिग्री असे अनेक अभ्यासक्रम सुरू होतील. सध्या असे अभ्यासक्रम विविध सस्थांचे आहेत, परंतु ते सरकारमान्य नाहीत. सध्या योगाची विविध तंत्रे असून प्रत्येक संस्था आपलं तंत्र चांगलं असल्याचा दावा करते. परंतु, विदयापीठाच्या माध्यमातून या सगळ्यात सुसूत्रता येईल अशी अपेक्षा आहे.