बाललैंगिक अत्याचारांबाबत महिला बालविकास आणि अधिकारी बेफीकीर

कर्जत पोलीस ठाण्याच्या वरिष्ठ अधिका-यांची चौकशी करुन त्यांच्यावर कडक कारवाई करण्याची मागणी शिवसेना उपनेत्या डॉ. निलम गो-हे यांनी केली.

पुणे : चंद्रभागा ट्रस्टच्या आश्रमशाळेमध्ये अजित दाभोळकर आणि ललिता तोंडे यांच्याकडून गेल्या सहा वर्षांपासून सुरु असलेल्या मुलांच्या लैंगिक शोषणाच्या घृणास्पद प्रकाराकडे जाणीवपुर्वक दुर्लक्ष करण्यात आले. याला रायगड जिल्ह्यातील बालविकास अधिकारी आणि कर्जत पोलीस ठाण्याच्या वरिष्ठ अधिका-यांची चौकशी करुन त्यांच्यावर कडक कारवाई करण्याची मागणी शिवसेना उपनेत्या डॉ. निलम गो-हे यांनी केली. याबाबतचे निवेदन गृहमंत्र्यांना दिल्याचे यावेळी गो-हे यांनी सांगितले.
रायगड जिल्ह्यातील टाकवे गावामध्ये चंद्रभागा ट्रस्टच्यावतीने चालवल्या जाणा-या आश्रमशाळेमध्ये मुलामुलींचे लैंगिक शोषण होत असल्याचा प्रकार उघडकीस आला. याप्रकरणी दाभोळकर आणि तोंडे हिला अटक करण्यात आली आहे. ललिता तोंडे हिचा पती भगवान तोंडे याचा २० जून २००२ रोजी संशयास्पद अवस्थेत मृत्यू झाला होता. त्यांच्या मृत्यूची चौकशी सीआयडीमार्फत व्हावी अशी मागश्णी त्यांनी केली. दाभोळकरच्या गैरकृत्यांकडे जाणिवपुर्वक दुर्लक्ष करण्यात असून यामागे रायगड जिल्ह्यातील मोठी व्यक्ती असल्याचा आरोपही गो-हे यांनी केला. यावेळी भगवान तोंडेंचे भाऊ नारायण, बहीण राधिका भोकरे, संजय खोपडे उपस्थित होते.
गो-हे म्हणाल्या की, आश्रमशाळेत चालणा-या गैरप्रकारांची माहिती भगवान तोंडे यांना झाली होती. तसेच दाभोळकर आणि ललिता यांच्यातील अनैतिक संबंधातूनच तोंडे यांचा खून करण्यात आला. रायगड पोलिसांनी २००९ मध्ये कोणतीही कल्पना न देता अचानक खुनाचा तपास बंद केला. त्याचवेळी पोलिसांनी ट्रस्टची तपासणी केली असती तर सर्वच गैरप्रकार उघडकीस आले असते. स्थानिक पोलीस अधिक्षक आणि काही अधिका-यांची दाभोळकरचे संबंध असल्यामुळे त्याला वाचवण्यात आल्याचा आरोपही त्यांनी केला. खुनाच्या तपासातील तत्कालीन तपासी अधिका-यांची चौकशी करण्यात यावी. तसेच दाभोळकर व ललिताला जामिन मिळू नये. पिडीत मुलामुलींचे जबाब कलम १६४ नुसार लेखी स्वरुपात घेण्यात यावेत अशी मागणी गो-हे यांनी केली,.