आम्ही एक पाऊल पुढे आलो, तुम्हीही या - अमित शहांचे शिवसेनेला आवाहन

कोल्हापूर, दि. १८ - ' चर्चेसाठी भाजप एक पाऊल पुढे आला आहे, इतरांनीही एक पाऊल पुढे टाकावं आणि युतीचा तिढा मिटवून टाकावा' असे आवाहन भाजपाध्यक्ष अमित शहा यांनी शिवसेनेला केले आहे. तीन दिवसांच्या महाराष्ट्र दौ-यावर आलेले शहा यांनी कोल्हापुरातील सभेत जागावाटपाबाबात हे सूचक वक्तव्य करत जागावाटप सन्मानपूर्वक व्हावे अशी अपेक्षाही व्यक्त केली आहे.

विधानसभा निवडणुका अवघ्या महिन्याभरावर येऊन ठेपलेल्या असतानाही भाजप-शिवसेनेमधील जागावाटपावरून असलेले मतभेद संपलेले नाहीत. त्याच पार्श्वभूमीवर शहा यांनी ' हा प्रश्न लवकर निकालात काढावा आणि एकत्र येऊन आघाडी सरकारला हटवावे,' असे आवाहन केले आहे. लोकसभा निवडणुकीत अभूतपूर्व यश मिळववल्यानंतर भाजपला आता महाराष्ट्रात सत्ता स्थापनेची घाई असून त्यासाठीच ते निम्म्या जागांच्या मागणीसाठी आग्रही आहेत. मात्र लोकसभेत भाजपाला तर विधानसभेत शिवसेनेला अधिक जागा हे गेल्या अनेक वर्षांपासूनचे असलेले सूत्र शिवसेना बदलण्यास तयार नाही. यामुळेच भाजप नेते नाराज असून गरज पडल्यास स्वबळावर लढण्याची तयारी त्यांनी दर्शवली. मात्र शिवसेना आपल्या भूमिकेवर ठाम असून हा पेच वाढतच चालला असून शहा यांचे हे विधान महत्वपूर्ण मानले जात आहे. 

या सभेदरम्यान शहा यांनी आघाडी सरकारवर कडाडून टीका केली. 'काँग्रेस-राष्ट्रवादीने महाराष्ट्राचे वाटोळं केलं. एकेकाळी सर्व बाबतीत पुढे असलेला महाराष्ट्र आता पिछाडीवर पडला आहे, राज्यात अनेक घोटाळे झाले, मात्र त्याच्या चौकशीचे फक्त नाटक होते, ' असे ते म्हणाले. शरद पवारांनी राजकारणाचे व्यापारीकरण केले, अशा शब्दांत त्यांनी पवारांवर टीका केली. आघाडी सरकारमुळे तिजोरीत खणखणाट झाला असून आता महाराष्ट्रात परिवर्तनाची गरज असल्याचे मतही त्यांनी व्यक्त केले. भाजपच्या प्रत्येक कार्यकर्त्याने एकजूट होऊन सरकार बदलण्यासाठी प्रयत्न केला पाहिजे, सर्वांनी संघर्षासाठी तयार रहा आणि आघाडी सरकारला उखडून फेका, असे आवाहनही त्यांनी कार्यकर्त्यांना केले.