विसर्जीत गणेश मूर्ती डम्पींग ग्राऊंडवर!

खामगाव नगरपालिकेचा फिरत्या विसर्जन कुंडाचा उपक्रम वादात, मूर्तींची विटंबना, नगराध्यक्ष आणि मुख्याधिका-यांवर गुन्हा दाखल.

खामगाव (बुलडाणा): पर्यावरणपूरक गणेशाचे विसर्जन करण्याची साद घालून विसर्जनासाठी आलेल्या गणेश मूर्ती डम्पींग ग्राऊंडवर कचर्‍यात टाकण्यात आल्याच्या तक्रारीवरून शिवाजीनगर पोलीस ठाण्यात धार्मिक भावना दुखावल्याप्रकरणी बुधवारी रात्री उशीरा गुन्हा दाखल करण्यात आला आहे. बुधवारी दुपारी ओमप्रकाश शर्मा यांनी दिलेल्या तक्रारीवरून हा गुन्हा दाखल करण्यात आला आहे. बुधवारी रात्री यासंदर्भात पोलीस स्टेशनला दाखल झालेल्या तक्रारीत म्हटले आहे की, खामगाव नगरपरिषदेचे मुख्याधिकारी आणि नगराध्यक्षांनी फिरते जलकुंड तयार करुन त्यामध्ये गणेश विसर्जन करण्याचे आवाहन नागरिकांना केले होते. या आवाहनाला प्रतिसाद देत फिरत्या जलकुंडामध्ये गणेश विसर्जन करण्यात आले; मात्र ३0 सप्टेंबर रोजी डम्पींग ग्राऊंड (कचरा साठविण्याचे मैदान) परिसरात गेलो असता, त्याठिकाणी गणेश मूर्ती कचर्‍यात आढळून आल्या, असा आरोप तक्रारीमध्ये करण्यात आला आहे. हा प्रकार कुणाला समजू नये, यासाठी गणेश मूर्तीवरुन वाहन फिरविण्यात आल्याचा आरोप तक्रारकर्त्याने केला आहे. धार्मिक पध्दतीने गणेश विसर्जन करण्याची कोणतीच सुविधा उपलब्ध नसताना, शासनाचा निधी व यंत्रणेचा दुरुपयोग करून नागरिकांचा विश्‍वासभंग केला असल्याचा आरोपही तक्रारीमध्ये करण्यात आला आहे. याप्रकरणी मुख्याधिकारी, तसेच नगराध्यक्ष अशोककुमार सानंदा आणि इतरांविरुध्द कारवाई करण्याची मागणी तक्रारीद्वारे करण्यात आली आहे. याप्रकरणी शिवाजीनगर पोलीस ठाण्यात दोघांविरूध्द धार्मिक भावना दुखावल्याप्रकरणी गुन्हा दाखल करण्यात आला असून, पुढील तपास सुरू आहे.

पोलीस स्टेशनमध्ये गर्दी

ओमप्रकाश शर्मा यांनी शिवाजीनगर पोलिस स्टेशनला तक्रार दिल्यानंतर उपविभागीय पोलिस अधिकारी रुपाली दरेकर, स्थानिक गुन्हे शाखेचे पोलीस निरीक्षक सुर्यकांत बांगर या तक्रारीवर निर्णय घेण्यासाठी पोलीस ठाण्यात दाखल झाले होते. कारवाई करण्याच्या मागणीसाठी ओमप्रकाश शर्मा यांच्यासह त्यांचे सर्मथक मोठय़ा संख्येने पोलिस स्टेशनसमोर जमा झाले होते. नगरपरिषदेचे मुख्याधिकारी डी.ई.नामवाड यांनीसुध्दा पोलिस स्टेशनमध्ये जाऊन याप्रकरणी आपली बाजु मांडली. या तक्रारीच्या अनुषंगाने कायदेशीर बाबी तपासण्याचे काम रात्री उशिरापर्यंत सुरु होते.