जळगाव, दि. 16 - स्कूल बसला ट्रेलरने धडक दिल्याची घटना घडली आहे. उभ्या असलेल्या स्कूलबसला ट्रेलरने मागून जोरदार धडक दिली. या अपघातात चार मुलं जखमी झाली आहेत. ही घटना शनिवारी सकाळी सव्वासात वाजेच्या दरम्यान येथील भुसावळ रस्त्यावरील फालक नगर बस थांब्यावर घडली आहे.
तालुक्यातील न्हावी येथील जे. टी. महाजन इंग्लिश मीडिअम स्कूल बस शनिवारी सकाळी शाळकरी मुलांना घेण्यासाठी येथील फालक नगरातील बसथांब्यावर थांबलेली असताना भुसावळकडे जात असलेल्या ट्रेलर क्र.एच. आर. ३८- व्ही. ७७९४ ने बसला जोरदार धडक मारली. यात चार मुलं किरकोळ जखमी झाली आहेत. सुदैवाने मोठं नुकसान झालं नाही. ट्रेलरने दिलेल्या धडकेने बसच्या मागील काच फुटून बसचे मागील भागाचे नुकसान झाले आहे. घटनेचे वृत्त समजताच परीसरातील नागरीकानी घटनास्थळी धाव घेतली आहे. या मुलांना तातडीने रुग्णालयात उपचारासाठी पाठविण्यात आले आहे. घटनास्थळी तातडीने पोलीस पोहचले असून ट्रेलरसह चालकास ताब्यात घेतलं आहे. सध्या गुन्हा नोंदविण्याचं काम सुरू आहे. जखमीमधील काही मुलं असल्याने व घटनेचे वृत्त समजताच पालकांनी यावलला धाव घेतली.