धागेदोरे थेट महसूल विभागापर्यंत!

महसूल मंत्रालयात अडलेले जमिनीच्या मंजुरीचे एक प्रकरण मंजूर करवून देण्यासाठी ३० कोटी रुपयांची लाच मागितल्याचे धागेदोरे थेट मंत्रालयापर्यंत असल्याचे समोर आले आहे.

यदु जोशी,  मुंबई
महसूल मंत्रालयात अडलेले जमिनीच्या मंजुरीचे एक प्रकरण मंजूर करवून देण्यासाठी ३० कोटी रुपयांची लाच मागितल्याचे धागेदोरे थेट मंत्रालयापर्यंत असल्याचे समोर आले आहे. महसूलमंत्री एकनाथ खडसे यांचे ओएसडी उन्मेश महाजन यांचे नाव तक्रारीमध्ये नमूद करण्यात आले आहे.
या प्रकरणी अटक झालेला गजानन उर्फ गजमल लक्ष्मण पाटील याच्याविरुद्ध आठ महिन्यांपूर्वीच लाचलुचपत प्रतिबंधक विभागाकडे तक्रार करण्यात आली होती. तेव्हापासूनची त्याची मोबाइल संभाषणे आणि इतर हालचालींवर नजर ठेवली जात होती. पाटील हा वारंवार लाचेची मागणी करीत असल्याची खातरजमा झाल्यानंतर त्याला मंत्रालयाच्या गेटवर पंचांसमक्ष शुक्रवारी अटक करण्यात आली.
या प्रकरणात लाचलुचपत प्रतिबंधक विभागाकडे तक्रार नोंदविणारे डॉ. रमेश केशव जाधव (वय ७०) हे उच्चशिक्षित (पीएचडी) आहेत. देशविदेशात खासगी क्षेत्रात महत्त्वाच्या पदांवर काम करून ते सेवानिवृत्त झाले. त्यांची इंटरनॅशनल सोसायटी फॉर एक्सलन्स इन प्रोजेक्टस् मॅनेजमेंट अँड रिसर्च ही सामाजिक संस्था आहे. त्यांच्या मित्रांनी १९९५ मध्ये ती स्थापन केली होती.
या संस्थेचे शैक्षणिक संकुल उभारण्यासाठी त्यांनी आधी ठाणे जिल्ह्याच्या कल्याण तालुक्यातील मौजे निळजे येथील जमीन मागितली होती. ती गायरानाची असल्याचे सांगून त्यांना आघाडी सरकारच्या काळात नकार देण्यात आला होता.
डॉ. जाधव यांनी शनिवारी त्यांच्या अंधेरीतील निवासस्थानी ‘लोकमत’ला सांगितले की, ‘आमच्या संस्थेला याच तालुक्यातील नांदीवली येथील जमीन देण्याची लेखी तयारी शासनाने दर्शविली होती. अर्थात, रेडीरेकनरनुसार या जमिनीच्या किमतीपोटी ५ कोटी ७० लाख रुपये भरण्याची तयारी संस्थेने दर्शविली होती. ७७ लाख ४० हजार रुपये इतकी रक्कम संस्थेने शासनाकडे भरलीदेखील होती. महसूलमंत्र्यांकडून या जमिनीची अंतिम मान्यता मिळविण्यासाठी पाटील आपल्याकडे पैशांची मागणी करायचा.’
‘सदर जमीन मिळावी, यासाठी आपण मुख्यमंत्री देवेंद्र फडणवीस, महसूलमंत्री खडसे यांची भेट घेतली होती,’ असे त्यांनी सांगितले. ‘खडसे यांनी पत्रकारांशी बोलताना, ज्या जमिनीचा हा विषय आहे, त्याबद्दल २०१४ मध्येच निर्णय देण्यात आला होता. आता हे मुद्दाम केले जात आहे. या प्रकरणाची चौकशी करायला हवी. गजानन पाटीलला मी ओळखतो. तो मतदारसंघातला आहे,’ अशी प्रतिक्रिया दिली.
>२०११ मध्ये झाली होती याच प्रकरणी अटक
डॉ. जाधव यांच्या संस्थेने मौजे निळजे (ता. कल्याण, जि.ठाणे) येथील ३७ एकर जमिनीची मागणी शासनाकडे केली होती. त्यासाठी स्थानिक ग्रामपंचायतीचे ना हरकत प्रमाणपत्र देण्यासाठी ६ कोटी रुपयांची लाच मागितली, म्हणून जाधव यांच्या तक्रारीवरून २०११ मध्ये निळजेचे तत्कालीन सरपंच, चार ग्रामपंचायत सदस्य आणि ग्रामसेवकास अटक करण्यात आली होती.काय म्हणायचा पाटील?
‘जमीन मिळण्यासाठी पाठपुरावा म्हणून मी महसूलमंत्री खडसे यांच्या कार्यालयात जात होतो. तेव्हा गेल्या वर्षी मंत्र्यांचे ओएसडी उन्मेश महाजन यांची भेट घ्यायचो. तेथे गजानन पाटीलची पहिल्यांदा भेट झाली. त्याने काम करवून देण्यासाठी लाच मागितली,’ असे डॉ. जाधव यांनी तक्रारीत म्हटले आहे. ‘तुम्हाला आॅर्डरच द्यायची आहे ना देतो, १५ सीआर (कोटी) लागतील. आता आणून ठेवाल, तिथे रामटेकवर कसे काय करायचे ते सांगतो. हा आकडा उन्मेशने सांगितला. तुम्हाला द्यायला वेळ लागेल ना,’ अशी पाटीलची वाक्येही तक्रारीत नमूद आहेत. १५ कोटींचा आकडा नंतर त्याने ३० कोटींवर नेला.पाटीलचा मुक्त वावर : गजानन उर्फ गजमल पाटील हा मुक्ताईनगर तालुक्यातील मेळ सांगवे येथील रहिवासी असून, तो कट्टर खडसे समर्थक मानला जातो. गेली काही वर्षे तो आमदार निवासातच बरेचदा राहायचा. खडसे यांच्या मंत्रालयातील कार्यालयात त्याचा मुक्त वावर असे. तक्रारकर्ते जाधव आणि त्याच्या मंत्रालयात गाठीभेटी झाल्या, असे तक्रारीत म्हटले आहे. लोकायुक्तांकडे तक्रार
गजानन पाटीलविरुद्ध डॉ. जाधव यांनी राज्याचे लोकायुक्त एम. एल. टहेलयानी यांच्याकडे तक्रार केली आहे. पाटीलच्या संभाषणाच्या टेप्स् सादर करण्याचे आदेश टहेलयानी यांनी दिले आहेत.दोन दिवसांची कोठडी
गजानन उर्फ गजमल पाटीलला शनिवारी मुंबईतील सत्र न्यायालयात हजर केले असता, न्यायाधीशांनी त्याला दोन दिवसांची पोलीस कोठडी सुनावली. याची अधिक चौकशी करायची असल्याने पोलीस कोठडीची मागणी एसीबीने केली होती.