-दिनकर गांगलफलटणच्या वैशाली शिंदे यांनी २००६-०७ साली सुरू केलेले प्ले स्कूल एव्हाना ज्युनियर कॉलेजपर्यंत पोहोचले आहे. संस्थेत आठशे-हजार मुले आहेत. तरी ती संस्था ‘आयडियल किड्स’ म्हणूनच ओळखली जाते. तसे प्रेम वैशाली यांनी फलटण परिसरात निर्माण केले आहे. त्यांची शाळा ‘इंटरनॅशनल’ म्हणून हाँगकाँगच्या ख्यातनाम संस्थेबरोबर रजिस्टर करण्यात आली आहे. त्याचा फायदा होऊन शाळेतील मुले आंतरराष्ट्रीय स्पर्धांत चमकताना दिसतात. शाळेचा एक मुलगा इशान मेनसे - एलजी कंपनीच्या आंतरराष्ट्रीय जाहिरातीत आहे, तर दुसऱ्या दोन मुलांची - वेदांत राऊत आणि रिधीमा साळुंके - आंतरराष्ट्रीय ‘रॅम्प वॉक’साठी निवड झाली आहे. पैकी रिधीमा साळुंके लंडनला जाऊन तिचा दिमाख जाहिरात ‘शो’मध्ये दाखवूनदेखील आली. त्याचबरोबर मिमि खडसे ही चिमुकली अभिनय क्षेत्रात गाजत आहे.
वैशाली शिंदे यांना हे यश त्यांच्या शिक्षणविषयक दृष्टिकोनातून लाभले, असे त्यांचे म्हणणे आहे. शिक्षणकाळात मुलांची सर्वांगीण वाढ व्हावी, कोणाला कोठल्या क्षेत्रात कोणत्या प्रकारची कुशलता असते हे आधीच सांगता येत नाही. मुलांसमोर सर्व संधी उपलब्ध असाव्यात, यादृष्टीने त्यांनी त्यांच्या संस्थेत सोयीसुविधा करून घेतल्या.
वैशाली शिंदे यांचे स्वतःचे शिक्षण माण तालुक्यात कुदळे यांच्या घरात अत्यंत प्रतिकूल परिस्थितीत झाले. त्या म्हणाल्या की, घरी अक्षरशः खाण्यास अन्न नव्हते. म्हणून माझे लग्न फलटणच्या शिंदे यांच्या घरात लावून दिले. मी शिक्षणात सतत सर्वोत्कृष्ट होते व सर्वोत्कृष्ट राहिले - एम. ए. बी. एड्. होईपर्यंत. माझा कधीच दुसरासुद्धा नंबर आला नाही ! वैशाली यांना सासू नव्हती, पण प्रेमळ सासरे महादेव शिंदे होते. त्यांनी वैशाली यांचे सर्व शिक्षण पूर्ण केले. त्याकरिता ते त्यांना शाळा-कॉलेजमध्ये सायकलवर डबलसीटदेखील घेऊन जात. वैशाली यांना स्वयंपाकसुद्धा त्यांनीच शिकवला.
वैशाली यांनी स्वयंप्रेरणेने प्रथम ‘डे केअर’ व ‘प्ले स्कूल’ सुरू केले. ती त्यांची स्वत:ची किंमत होती. त्यामुळेच त्या छोट्या आरंभातून त्यांच्या ‘गोल्डन ड्रीम एज्युकेशन सोसायटी’चा एवढा मोठा व्याप उभा राहिला आहे ! संस्था आहे भाड्याच्या जागेत, संस्थेत पंचावन्न शिक्षिका-शिक्षक आहेत. वैशाली म्हणाल्या की, ते संस्थेचे वैभव असते. वैशाली स्वत: शाळेला दिवसाचे २४ तास देतात. त्या म्हणाल्या, “मे महिन्यातसुद्धा मी व शिपाई मिळून, आम्ही शाळा सुरू ठेवतो. त्यातून मुलांना नवनव्या संधी उपलब्ध करून देता येतात.”
वैशाली आहेत धाडसी व बेधडक. त्या म्हणतात की, प्रगत तंत्रज्ञान ही आमच्या शाळेची ताकद आहे. त्या जोरावर आम्ही जुन्या, मातब्बर शिक्षण संस्थांसमोर आमचे शिक्षणप्रसाराचे, मुलांमध्ये आधुनिक दृष्टी रुजवण्याचे कार्य सुरू ठेवू शकतो.