मुंबई - शिवसेनेचे पालघरचे खासदार राजेंद्र गावित यांनी मतदारसंघातील अनेक नगरसेवक, जिप सदस्य आणि आमदारांसह एकनाथ शिंदे गटात प्रवेश केल्याचे वृत्त आल्याने राजकीय वर्तुळात खळबळ उडाली होती. दरम्यान, आता राजेंद्र गावित यांनी शिंदे गटात प्रवेश केल्याचं वृत्त फेटाळलं असून, आपण उद्धव ठाकरे यांच्यासोबतच असल्याचं स्पष्ट केलं आहे. आपण मुख्यमंत्री एकनाथ शिंदेंची केवळ सदिच्छा भेट घेतली होती, असा खुलासा त्यांनी केला आहे.
राजेंद्र गावित याबाबत स्पष्टिकरण देताना म्हणाले की, मी राज्याचे मुख्यमंत्री एकनाथ शिंदे यांची मतदारसंघातील काही कामांनिमित्त सदिच्छा भेट घेतली. मी शिंदे गटात प्रवेश केलेला नाही. शेवटी ते राज्याचे मुख्यमंत्री आहेत. त्यामुळे कुठल्याही मतदारसंघातील तसेच पक्षातील लोक भेटू शकतात.माझ्या मतदारसंघातील अनेक नगरसेवक, जिप सदस्य हे शिंदे गटात गेले आहेत. ही वस्तुस्थिती आहे. मात्र माझ्यापुरता प्रश्नविचारल्यास मी केवळ सदिच्छा भेटीसाठी गेलो होते. मी शिंदे गटात गेलेलो नाही, असं राजेंद्र गावित यांनी स्पष्ट केलं आहे.
दरम्यान, वसई - विरार मनपातील ५, विक्रमगड नगर पंचायतीमधील जिजाऊ संघटनेचे १९ नगरसेवक, तलासरी नगर पंचायतीतील जिजाऊ संघटनेचे ५ नगरसेवक, मोखाडा नगर पंचायतीच्या १२ नगरसेवकांनी एकनाथ शिंदे यांच्या नेतृत्वाखालील युती सरकारला आपला जाहीर पाठींबा देण्याचा निर्णय घेतला. यासोबतच वसई तालुका आणि बाईसर विभागातील प्रमुख पदाधिकारी निलेश तेंडुलकर, उपजिल्हाप्रमुख नवीन दुबे, बोईसर शहरप्रमुख मुकेश पाटील, जिल्हा नियोजन समिती सदस्य कुंदन संख्ये यांनीही हाच निर्णय घेतला आहे. या सगळ्यांच्या साथीने शिवसेनेची ठाणे ग्रामीण भागातील आमची ताकद वाढली आहे असा विश्वास मुख्यमंत्री एकनाथ शिंदे यांनी व्यक्त केला. याप्रसंगी पालघर लोकसभा मतदारसंघाचे खासदार राजेंद्र गावित, आमदार रवींद्र फाटक, आमदार श्रीनिवास वनगा, माजी पालघर जिल्हाप्रमुख राजेश शहा तसेच जिजाऊ संघटनेचे अध्यक्ष निलेश सांबरे उपस्थित होते, मात्र आता राजेंद्र गावित यांनी आपण शिंदे गटात गेलो नसल्याचे सांगितल्याने तर्कवितर्कांना उधाण आले आहे.