Shiv Sena Thackeray Group News: आमदार अपात्रता प्रकरणाचा निकाल हा ठाकरे गटासाठी धक्का मानला जात आहे. यानंतर या निर्णयाविरोधात सर्वोच्च न्यायालयात जाण्याचा पर्याय ठाकरे गटाकडे असल्याचे सांगितले जात आहे. यावर प्रतिक्रिया देताना ठाकरे गटाचे नेते अनिल परब यांनी शिवसेना आणि ठाकरे कधीच वेगळे होऊ शकत नाही, असे म्हटले आहे.
भरत गोगावलेंचा व्हीप आम्हाला मंजूर करायची गरज नाही. सर्वोच्च न्यायालयाने आमच्या विरोधात निकाल दिला तर आम्हाला वेगळ्या पक्षाची नोंदणी करण्याचा अधिकार आहे. आम्हाला अपात्र ठरवण्यात आलेले नाही. त्यांच्या लेखी पक्षविरोधी कारवाई आम्ही केली मग आम्हाला त्यांनी अपात्र का ठरवले नाही? असा सवाल अनिल परब यांनी केला. जे काही नार्वेकर बोलले तो ड्राफ्ट लिहून आलेला आहे. सर्वोच्च न्यायालयात आम्ही गेलो आहोतच. त्यांनी व्हीप बजावावा आम्ही तो व्हीप मान्य करणार नाही. या प्रकरणी सर्वोच्च न्यायालय काय निर्णय देते ते पाहू, असे अनिल परब यांनी स्पष्ट केले आहे.
आमची मशाल आता सगळीकडे धगधगतेय, त्याचाच त्यांना त्रास होतोय
आमची मशाल आता सगळीकडे धगधगत आहे. त्याचाच त्यांना त्रास होत आहे. या मशालीची ताकद त्यांना लवकरच कळेल. कित्येक लोकांनी बाळासाहेबांना पाहिले नाही, ते म्हणतात आम्ही बाळासाहेबांचे विचार पुढे घेऊन जात आहोत. या लोकांना काही अडचण होती, तर मविआचे सरकार स्थापन करतानाच त्यांनी सांगायला हवे होते. मंत्रीपद नाकारायला हवे होते. मंत्रिमंडळात यायचे नव्हते. आम्ही पण यातून गेलो होतो, काय दवाब टाकला जातो हे आम्हालाही माहिती आहे, या शब्दांत अनिल परब यांनी विरोधकांवर निशाणा साधला.
दरम्यान, शिवसेना आणि ठाकरे कधीही वेगळे होऊ शकत नाही. शिवसनेचे सगळे चांगले वाईट दिवस आम्ही बघितले आहोत. त्यामुळे जर हे आम्हाला सांगत असतील की बाळासाहेबांचे विचार घेऊन पुढे चाललो आहोत, त्यांना जर काही अडचण होती, तर तेव्हाच राजीनामा द्यायला हवा होता. आम्ही सैनिक आहोत, पक्षाच्या प्रमुखांनी जो निर्णय घेतला, तो आम्ही मान्य करतो, त्यावर आम्ही प्रश्न विचारत नाही, असे अनिल परब यांनी स्पष्टपणे सांगितले.