दोन मुलांसह मातेची विहिरीत आत्महत्या

मातोळा तालुक्यातील घटना.

कोथळी (जि. बुलडाणा) : मातेने दोन चिमुकल्यांसह विहिरीत उडी घेऊन आत्महत्या केल्याची घटना १८ जून रोजी मोताळा तालुक्यात पिंपळगाव राजा पोलीस ठाण्याच्या हद्दीतील पिंपळगाव नाथ शिवारात उघडकीस आली. पिंपळगाव नाथ येथील सोनाबाई धनराज वाघमोडे (२८) ही १८ जून रोजी ४:३0 च्या सुमारास सात वर्षीय गोपाल व पाच वर्षांच्या सोनू या दोन मुलांसह गावापासून लांब असलेल्या स्वत:च्या शेतात बकर्‍या चारण्यासाठी गेली होती. दरम्यान, दुपारी साडेचार वाजताच्या सुमारास स्वत:च्या शेतात असलेल्या विहिरीत तिने मुलांसह उडी घेतली. बराच वेळपर्यंत सोनाबाई घरी परत न आल्याने मोठा मुलगा व पती धनराज वाघमोडे यांनी शोध घेतला असता, शेतातील विहिरीच्या काठावर तिची चप्पल आढळून आली. शंका आल्याने विहिरीत डोकावून पाहिले असता, त्यांना सोनाबाईसह या दोन्ही मुलांचे प्रेत तरंगताना आढळून आले. ही माहिती पोलीस पाटील घोरपडे यांनी पिंपळगाव राजा पोलीस ठाण्यात दिल्यांनतर ठाणेदार वंजारी यांनी ताफ्यासह घटनास्थळ गाठले. तिघांचे मृतदेह विहिरीतून काढून तेथेच पंचनामा करण्यात आला. घटनेचे गांभीर्य पाहून एसडीपीओ समीर शेख यांनीही घटनास्थळाला भेट दिली. पंचनाम्यानंतर १९ जून रोजी शवविच्छेदनासाठी मृतदेह खामगाव येथे रुग्णालयात रवाना करण्यात आले. वृत्त लिहीपर्र्यंत मृत्यूचे नेमके कारण कळू शकले नाही.