‘एसी’च्या प्रवाशांना एसटीचे चटके

एसटी महामंडळाचा कारभार सध्या गोंधळातच सुरू असून त्याचा प्रत्यय एसी बसमधून प्रवास करणार्‍या प्रवाशांना येत आहे.

मुंबई : एसटी महामंडळाचा कारभार सध्या गोंधळातच सुरू असून त्याचा प्रत्यय एसी बसमधून प्रवास करणार्‍या प्रवाशांना येत आहे. मुदत संपलेल्या आणि नादुरुस्त होत असलेल्या एसी बसेसवर कुठलाही तोडगा न काढता त्याच बसेस पुन्हा एक वर्ष तरी प्रवाशांच्या माथी मारण्याचे काम एसटी महामंडळाकडून करण्यात आले आहे. टेंडर (निविदा) काढताना त्यामध्ये तीन वेळा बदल करण्याचा प्रताप महामंडळाने केल्याने त्याचा फटका एसटी महामंडळाला बसत असल्याचे उघड झाले आहे. एसटीच्या ताफ्यात सध्याच्या घडीला ११0 एसी बसेस आहेत. यातील २५ बसेसची तीन वर्षांची मुदत असून ती कधीच संपली आहे. या बसचे कंत्राट ज्यांच्याकडे आहे, त्या कंत्राटदारांना त्यांचे कंत्राट वाढवून मिळत नव्हते. त्यामुळे त्याकडे मुद्दाम दुर्लक्ष करत या २५ बसेस वार्‍यावर सोडण्याचे काम कंत्राटदारांकडून करण्यात आले आणि या बसेसची अवस्था खूपच बिकट झाली. १ जानेवारी २0१४ रोजी २0 फेब्रुवारीपर्यंत २५ एसी बसची दुरुस्ती आणि त्यात बदल करून त्या पुन्हा सेवेत घेण्याचा निर्णय महामंडळाच्या बैठकीत झाला होता. आणखी १० नवीन एसी बस घेण्यात येणार होत्या. त्यासाठी टेंडरच्या अटींमध्ये बदल करण्यात आले. मात्र, टेंडरच्या नियमात पडलेले बदल एसटीच्याच पथ्यावरच पडल्यानंतर कंत्राटदारांनी तीन वर्षांची मुदत संपताच त्याकडे दुर्लक्ष केले आणि या बसेसची अवस्था बिकट होत गेली. त्यानंतर फेब्रुवारीच्या सुरुवातीला पुन्हा बदल करत पात्रता अट शिथिल केली. मात्र, हादेखील बदल न रुचल्याने १० दिवसांनी अटीत पुन्हा बदल करण्याचा प्रताप एसटी महामंडळाने केला आणि टेंडर नव्याने काढले. टेंडरमधील बदल कंत्राटदारांना न रुचल्याने अखेर टेंडर रद्दच करण्याचा निर्णय घेण्यात आला आणि जुन्याच कंत्राटदारांना टेंडर देऊन त्यांना मुदतवाढ देण्यात आली. मात्र, या सगळ्या गोंधळामुळे एसी बसकडे दुर्लक्ष करण्यात आले आणि अखेर नादुरुस्त बसेस प्रवाशांच्या माथी मारल्या जात असल्याचे एसटीतील सूत्रांनी सांगितले. (प्रतिनिधी)