सिंदखेडराजाची ऐतिहासिक तोफ सापडली!

राष्ट्रमाता जिजाऊंचे जन्मस्थळ असलेल्या सिंदखेडराजा येथील राजे लखोजीराव जाधव यांच्या राजवाड्यातील शासकीय

सिंदखेडराजा (जि़ बुलडाणा) : राष्ट्रमाता जिजाऊंचे जन्मस्थळ असलेल्या सिंदखेडराजा येथील राजे लखोजीराव जाधव यांच्या राजवाड्यातील शासकीय वस्तु संग्रहालयातून चोरी झालेली ८५ किलो वजनाची पंचधातूची तोफ पोलिसांनी शोधली असून, ही तोफ आंतरराष्ट्रीय बाजारपेठेत विकण्यात येणार होती, अशी माहिती पोलिसांना मिळाली आहे. पोलिसांनी तीन आरोपींना अटक केली असून, त्यांच्या चौकशीतून पुरातन वस्तु खरेदी-विक्रीचे आंतरराष्ट्रीय रॅकेट उघड होण्याची शक्यता वर्तविली जात आहे.
बुलडाणा जिल्ह्णातील आडगावराजा येथील भुईकोट किल्ल्याचे २० वर्षांपूर्वी उत्खनन केले असता, तेथील १३ एकर परिसरात पंचधातूच्या ८ तोफा सापडल्या होत्या. या तोफा सिंदखेडराजा येथील राजे लखोजीराव जाधव यांच्या राजवाड्यातील शासकीय वस्तु संग्रहालयात ठेवण्यात आल्या होत्या. त्यापैकी ८५ किलो वजनाची पंचधातूची तोफ २२ डिसेंबर रोजी रात्री चोरी झाली होती.
ही तोफ चोरण्याचा कट बाळू म्हस्के याने रचला होता. निमगाव वायाळ येथील ट्रॅक्टर चालक आकाश पंजाबराव निलक, दुसरबीड येथील शंकर शिवाजी केवट आणि बाळू म्हस्केचा सख्खा भाचा सिद्धार्थ काळे हादेखील कटात सहभागी होता.त्यांनी १९ डिसेंबर रोजी राजवाड्यात जाऊन तोफ चोरीची रंगीत तालीमही केल्याचे तपासात उघड झाले आहे़२२ डिसेंबर रोजी तिघे पुन्हा एकत्र आले आणि कटानुसार रात्री १२.३० वाजता राजवाड्यातून तोफ लंपास केली. त्यानंतर ही तोफ त्यांनी शिवणीटाका रोडवरील नगरपालिका हद्दीतील एका शेतात पुरून ठेवली. खोदकाम कुणाच्या लक्षात येऊ नये, यासाठी तोफ पुरलेल्या जागेवर सोयाबीनचे कुटार जाळले; मात्र पोलिसांनी ट्रॅक्टरच्या चाकाच्या खुणांचा मागोवा घेत शेतातील जागेचा शोध लावला. त्या जागेवर खोदले असता, पोलिसांना तोफ सापडली. पोलिसांनी शिताफीने तपासचके्र फिरवून, बाळू जगन्नाथ म्हस्के, आकाश संजाबराव निकाळजे, शंकर शिवाजी केवट यांना बुधवारी, तर सिद्धार्थ काळे याला गुरुवारी रात्री ८ वाजता अटक केली. (प्रतिनिधी)