Maharashtra Politics: शिवसेना उद्धव बाळासाहेब ठाकरे गट आणि शिवसेना शिंदे गटातील संघर्ष अद्यापही कायम आहे. अनेक नेते, पदाधिकारी आणि कार्यकर्ते ठाकरे गटाला जय महाराष्ट्र करत, शिंदे गटात प्रवेश करत आहेत. पक्ष संघटना मजबूत करण्यासाठी उद्धव ठाकरे राज्यातील काही ठिकाणी दौरे करताना दिसत असले, तरी मुख्यमंत्री एकनाथ शिंदे यांना राज्यभरातून पाठिंबा वाढत असल्याचे चित्र आहे. यातच आता ठाकरे गटाचे आमदार आणि संजय राऊत यांचे बंधू सुनील राऊत यांनी मोठा दावा केला आहे. सुनील राऊतांनी केलेल्या विधानाची राजकीय वर्तुळात चर्चा रंगल्याचे सांगितले जात आहे.
शिवसैनिकांना संबोधित करताना सुनील राऊत म्हणाले की, संजय राऊत यांनी भाजपसमोर जर गुडघे टेकले असते. तर ते साडेचार महिने जेलमध्ये गेले नसते. पण त्यांना ते कधीही मान्य नव्हते. ते जेलमध्ये असतानाचे त साडेचार महिने माझ्या घरच्यांनी कसे काढले हे फक्त आम्हालाच माहिती आहे. सगळे काही सहन केले परंतु आम्ही पक्ष सोडला नाही. सोडणारही नाही, असे सुनील राऊत यांनी स्पष्टपणे सांगितले.
संजय राऊत नावाचा ब्रँड माझ्या पाठिशी, मला १०० कोटींची ऑफर
मला याआधी शंभर कोटींची ऑफर होती आणि आज सुद्धा ऑफर आहे. कारण मी स्वतः आमदार आहेतच पण माझा ब्रँड संजय राऊत माझ्यामागे असल्यामुळे मला शंभर कोटींची ऑफर आहे. अशा कितीही ऑफर आल्या तरी आम्ही आमचा विचार बदलणार नाही. शंभर कोटी घेऊन माझ्यासारखा निष्ठावंत शिवसैनिक बदलणार नाही, असा दावा सुनील राऊत यांनी केला आहे. तसेच आमचीच माणसे विकत घेऊन जातात. आमच्याच माणसांना आमच्यासमोर उभे करतात. मला एकही रुपयाचा फंड सरकारकडून मिळत नाही. माझ्यावर ३५ कोटींचे कर्ज आहे. ३५ कोटींची काम केली पण सरकार मला पैसे देत नाही, असा आरोप सुनील राऊत यांनी केला आहे.
दरम्यान, माजी नगरसेवक उपेंद्र सावंत यांनी शिंदे गटात प्रवेश केला तेव्हा त्यांनी सुनील राऊत यांच्याशी आपले पटत नसल्याचे सांगितले. यावर बोलताना, १० दिवसांपूर्वी उपेंद्र सावंत मला म्हणाला की, मला सुद्धा ऑफर आहे. निधी करिता १५ कोटी आणि पाच कोटी कॅशची ऑफर आहे. त्यावेळी तो मला म्हणाला मी निष्ठावंत आहे मी घरी बसेल पण मी शिंदे गटात जाणार नाही. नंतर मी त्याला खूप फोन केले. पण त्याने माझे फोन घेतले नाहीत. नंतर मी त्याच्या बहिणीला फोन केला आणि मी तिला म्हणालो की, मी नसतो तर तो आज जेलमध्ये असता. माझ्याकडे त्याच्या चार ते पाच क्लिप अशा आहेत की त्या जर मी सोशल मीडियावर टाकल्या तर तो आपल्या मुलीला आणि बायकोला तोंड दाखवणार नाही. परंतु अशा गोष्टी करणे योग्य नाही हे आम्हाला कळते. मी उद्धव साहेबांना सांगितले की, पंधरा कोटींचा फंड आणि पाच कोटी कॅशवर उपेंद्र सावंत पक्ष सोडून चालला आहे, असे सुनील राऊत म्हणाले.