मुंबई : आवडलेली गाडी खरेदी करणारच अशी ओळख असलेले राष्ट्रवादीचे नेते व आमदार रोहित पवार यांना आता हेलिकॉप्टर घ्यायचे असून, तेही स्वता:चा कष्टाच्या पैशातून. ही माहिती खुद्द रोहित पवार यांनी दिली आहे. औरंगाबाद येथे एका दैनिकाला दिलेल्या मुलाखतीवेळी ते बोलत होते.
रोहित पवार हे अनेक प्रकारच्या कार, दुचाक्यांचे धनी आहेत. आवडलेली गाडी ते खरेदी करतातच. मात्र आता त्यांना गाडी नाही, तर हेलिकॉप्टर घ्यायचे आहे, तेही कष्टाच्या पैशातून. अनेकांना बाऊन्सर ठेवायला आवडते. मला तसे काही पटत नाही. अनेक जण शहर मागे पडले की, गाड्या बदलतात. असे एकीकडे एक आणि दुसरीकडे दुसरे वागणे जमत नाही, असे रोहित पवार यावेळी म्हणाले.
लहानपणापासून पवारसाहेबांना पाहत आलोय. ते राज्यातील कुठल्याही कोपऱ्यातून आलेल्या व्यक्तीला नावानिशी ओळखतात. त्यांची बुद्धिमत्ता प्रचंड आहे. त्यांच्यासारखी बुद्धिमत्ता स्वत:मध्ये बाणण्याचा प्रयत्न करतोय. पूर्वी मोबाईल नव्हते. त्यामुळे साहेबांचे काम प्रत्येक गावातल्या २० ते २५ ग्रामस्थांकडून चालायचे. अशा पद्धतीने गावागावात त्यांचे कार्यकर्ते सहज तयार झाले. आजही त्यांना ते नावानिशी ओळखतात. तंत्रज्ञानाच्या युगात मोबाईल आले आणि अनेकांची 'मेमरी लॉस' झाली. मला ती प्लस करत राहायची आहे, असेही ते यावेळी म्हणाले.