Rajya Sabha Election 2025: राज्यातून निवडून देण्याच्या राज्यसभेच्या सात जागांसाठी होणाऱ्या निवडणुकीत महाविकास आघाडीचा एक उमेदवार निवडून येऊ शकतो. मात्र या एका जागेवरून महाविकास आघाडीत रस्सीखेच सुरू असून, त्यावर अद्याप तोडगा निघू शकलेला नाही. राज्यसभेच्या निवडणुकीसाठी भाजपाच्या वाट्याला चार जागा येणार असून, यासाठी २५ नेते इच्छूक असल्याचे सांगितले जात आहे. यासंदर्भात भाजपाच्या कोअर कमिटीची एक बैठकही झाली होती. याबाबत भाजपाचे महाराष्ट्र प्रदेशाध्यक्ष रविंद्र चव्हाण यांनी महत्त्वाची माहिती दिली आहे.
रविंद्र चव्हाण दिल्लीत असून, पत्रकारांशी बोलताना त्यांनी यासंदर्भात प्रतिक्रिया दिली. राज्यसभेसाठी इच्छुक असलेल्या २५ जणांच्या नावाची यादी कोअर कमिटीच्या बैठकीत फायनल करण्यात आली होती. ही २५ जणांच्या नावाची यादी घेऊन भाजप प्रदेशाध्यक्ष रविंद्र चव्हाण तातडीने दिल्लीत दाखल झाले होते. या नावावर शुक्रवारी दिल्ली दरबारी चर्चा झाली. राष्ट्रीय अध्यक्ष नितीन नबीन यांच्यासोबतच्या बैठकीनंतर या चार नावांची घोषणा दिल्लीतून २ मार्च रोजी करण्यात येणार असल्याची माहिती रवींद्र चव्हाण यांनी पत्रकारांशी बोलताना दिली. त्याबाबतचा निर्णय भाजपाची केंद्रीय समिती घेणार असल्याचेही चव्हाण यांनी स्पष्ट केले.
या बाबतचा निर्णय लवकरच घेतला जाणार
भाजपाच्या कोअर कमिटीच्या बैठकीत फायनल करण्यात आलेल्या नावांवर दिल्लीत शिक्कामोर्तब केले जाणार आहे. राज्यसभेसाठी उमेदवारी अर्ज दाखल करण्यासाठी ३ मार्चपासून सुरुवात होणार आहे. त्यामुळे या बाबतचा निर्णय लवकरच घेतला जाणार असल्याचे समजते. या नावांमधून भाजप नेतृत्त्व कोणाची निवड करणार, याकडे राजकीय वर्तुळाचे लक्ष लागले आहे.
दरम्यान, दोन दिवसापूर्वी राज्यात झालेल्या भाजपच्या कोअर कमिटीच्या बैठकीला मुख्यमंत्री देवेंद्र फडणवीस, प्रदेशाध्यक्ष रविंद्र चव्हाण, रावसाहेब दानवे, चंद्रशेखर बावनकुळे, सुधीर मुनगंटीवार, पंकजा मुंडे, गिरीश महाजन, अतुल सावे, आशिष शेलार, अमित साटम उपस्थित होते. भाजपच्या या यादीत विनोद तावडे, रावसाहेब दानवे, डॉ. भागवत कराड, विजया रहाटकर, डॉ. भारती पवार, प्रीतम मुंडे, दिलीप कांबळे, अमर साबळे, रणजितसिंह नाईक निंबाळकर, कुणाल पाटील, माधव भांडारी अशी काही नावे असल्याची चर्चा राजकीय वर्तुळात असल्याचे सांगितले जात आहे.