कोल्हापूर: नुकत्याच झालेल्या राज्यसभेच्या निवडणुकीतत भाजपने शिवसेनेला चितपट केले. सहाव्या जागेसाठी शिवसेना आणि भाजप यांच्यात थेट लढत होती. यात भाजपचे धनंजय महाडिक (Dhananjay Mahadik) विजयी झाले. दरम्यान, या विजयानंतर कोल्हापूरकडे येत असताना स्वाभिमानी शेतकरी संघटनेचे अध्यक्ष राजू शेट्टी (Raju Shetti) यांनी महाडिक यांचे अभिनंदन केले. यावेळी महाडिक यांनीही राजू शेट्टींच्या पाया पडून त्यांचे आशिर्वाद घेतले. महाडिक यांच्या कृतीची सर्वत्र चर्चा होत आहे.
धनंजय महाडिक यांचे आज कोल्हापूरात जंगी स्वागत करण्यात आले. कोल्हापूरकडे जात असताना कराड येथे त्यांची राजू शेट्टींशी भेट झाली. यावेळी महाडिकांनी रस्त्यावरच शेट्टी यांचे आशीर्वाद घेतले. सोशल मिडीयामध्ये अनेकांकडून त्यांचा व्हिडीओ आणि फोटो शेअर केला जात आहे. धनंजय महाडिक यांच्या या कृतीचे कौतुकदेखील होत आहे.
खासदार धनंजय महाडिक यांनी ट्वीट करत राजू शेट्टी यांचे आभार मानले आहेत. तसेच, त्यांनी या भेटीचे फोटोही शेअर केले आहेत. या फोटोसोबत त्यांनी लिहीले की, 'स्वाभिमानी शेतकरी संघटनेचे अध्यक्ष, माजी खासदार राजू शेट्टी यांनी कराड येथे स्वागतपर सत्कार केला. विजयश्री संपादन केल्याबद्दल अभिनंदन करत पुढील वाटचालीसाठी शुभेच्छा त्यांनी यावेळी दिल्या. त्यांनी केलेल्या प्रेमपूर्ण सत्काराबद्दल त्यांचे आणि उपस्थित सर्वांचे आभार!'