बालगोविंदांचा हीरो ठरला राहुल करंडे

सर्वोच्च न्यायालयानेही बालगोविंदांवरची बंदी कायम ठेवल्यानंतर बालगोविंदा दहीहंडीत दिसणार नाहीत, अशी स्थिती निर्माण झाली होती.

मनीषा म्हात्रे - मुंबई

सर्वोच्च न्यायालयानेही बालगोविंदांवरची बंदी कायम ठेवल्यानंतर बालगोविंदा दहीहंडीत दिसणार नाहीत, अशी स्थिती निर्माण झाली होती. पण 12 वर्षे पूर्ण झालेल्या आणि 13 व्या वर्षात पदार्पण केलेल्या बालगोविंदांचा शोध ‘लोकमत’नेही घ्यायचे ठरवले. असा एक बालगोविंदांचा हीरो ठरलेला 13 वर्षीय कायदेशीर एक्का आम्हाला आढळून आला, तो म्हणजे राहुल विलास करंडे. 12 वर्षाचा टप्पा ओलांडल्याने तो बालगोविंदांच्या गळ्य़ातला जणू ताईत बनला होता. 

राहुल करंडे आपल्या आईवडिलांबरोबर सायनच्या प्रतीक्षानगर येथे राहण्यास आहे. गेल्या चार वर्षापासून सायनच्या एकलव्य गोविंदा पथकातून तो दहीहंडी फोडत आहे. सायनच्याच कर्मवीर विद्यालयात तो सातवी इयत्तेत शिकतो. तिसरीत असल्यापासूनच राहुलने दहीहंडीच्या थरांवर चढण्यास सुरुवात केली. सुरुवातीला पाच थरांवर चढणारी त्याची चिमुकली पावले सातव्या थरावर पोहोचली. तर दुसरीकडे दहीहंडी उत्सवात गंमत म्हणून पाहणा:या राहुलसाठी हाच दहीहंडीचा सण मानाचा, आनंदाचा बनत गेला.  

सर्वोच्च न्यायालयाच्या आदेशानंतर मात्र त्याने जोरदार जल्लोष केला. 12 वर्षाची अट त्याला लागू होत नव्हती. कारण त्याने 13 व्या वर्षात प्रवेश केलेला होता. त्यामुळे सर्वोच्च न्यायालयाच्या दिलासादायक निर्णयामुळे मला पुन्हा दहीहंडीचा थरार अनुभवायला मिळाल्याचा आनंद वाटत असल्याची भावना त्याने ‘लोकमत’शी बोलताना व्यक्त केली.

 

12 वे वर्ष ओलांडलेले असल्याने तो जोशात दहीहंडी उत्सवात सामील झाला होता. बालगोविंदांचा तो जणू हीरो झाला होता. कायदेशीररीत्या मिळालेला हक्क राहुलने समरसून साजरा केला. यंदाची दहीहंडी त्याच्यासाठी खास असल्याने सकाळपासून बजरंग बलीचा जयघोष करीत मुंबईतील अनेक हंडय़ा राहुलने फोडल्या. अनेक नामांकित हंडय़ांना सलामी देत तो पुढे जाताना दिसला. गर्दीतून जाताना त्याच्या चेह:यावरील उत्कट भावच खूप काही सांगून जात होते.