पालघर पालिकेचे अंदाजपत्रक शिलकी

शिलकीचे अंदाजपत्रक विरोधी पक्षनेत्यांसह काही नगरसेवकांनी सुचविलेल्या सुधारणांसह मंजूर करण्यात आला.

पालघर : नगरवासियांना कोणत्याही नवीन सोयीसुविधा न देणारा, मात्र त्याचवेळी त्यांच्यावर कराचा कोणताही नवीन बोजा न टाकणारा ५ कोटी ९८ लाख २८ हजार २३० रुपये शिलकीचे अंदाजपत्रक विरोधी पक्षनेत्यांसह काही नगरसेवकांनी सुचविलेल्या सुधारणांसह मंजूर करण्यात आला.
नगराध्यक्ष उत्तम पिंपळे यांच्या अध्यक्षतेखालील सभेत सुमारे साडेतीन तासाच्या चर्चेनंतर सभागृहाने यावर आपल्या अनुमतीची मोहर उठवली. आगामी वर्षातील या अर्थसंकल्पातील सफाई ठेका, औषध फवारणी आदी बाबी वरील प्रस्तावित वाढीव खर्चावर सदस्यांनी आक्षेप नोंदविला. सफाई ठेक्यासाठी आगामी वर्षात ३ कोटी इतकी प्रचंड तरतूद करण्यात आली आहे.
मागील ३ वर्षातील व चालू वर्षातील खर्चाच्या तुलनेत ही रक्कम अवास्तव असल्याचे व नागरिकां ऐवजी ठेकेदारांचेच हित जपणारे असल्याचा मोठा आक्षेप यावेळी सदस्यांनी घेतला. जंतू नाशके व औषध फवारणीच्या तरतूदी संदर्भातील नगरसेवकांनी असाच आक्षेप नोंदविला. जनतेच्या आरोग्याच्या दृष्टीने महत्वाच्या असलेल्या या सेवांचा दर्जा खर्चा बरोबरीने सुधारणे आवश्यक असतांना तो दिवसेंदिवस ढासळत आहे. तर त्यावरील खर्च वाढतो आहे अशी चिंताही सदस्यांनी यावेळी व्यक्त केली.
आगामी वर्षात ३० कोटी ५० लाख १३ हजार इतकी महसूली जमा व ५ कोटी ९८ लाख २८ हजार २३० रुपये इतक्या अपेक्षित शिलकेसह ४६ कोटी ४६ लाख ९७ हजार २३० इतकी रक्कम नगरपरिषदेला आपली विकास कामे व प्रशासकीय खर्चासाठी उपलब्ध होणार असून त्यापैकी ४० कोटी ४८ लाख ६८ हजार इतका खर्च आगामी वर्षात अपेक्षित आहे.
या वर्षातील आठ महिन्यातील प्रत्यक्षातील सुमारे १६ कोटी इतक्या खर्चाच्या अडीच पट इतका हा खर्च अपेक्षित आहे. सन २०१४-१५ व २०१५-१६ या वर्षात अनुक्र मे ३७ कोटी व ४२ कोटी इतका महसूल प्रत्यक्षात जमा झालेला असून २०१६-१७ मध्ये हा महसूल घसरत जाऊन २२.५० कोटी तर आगामी वर्षात ३०.५० कोटी म्हणजेच २०१४-१५ व २०१५-१६ च्या तुलनेत घसरलेला दिसतो.
२०१६-१७ च्या तुलनेत यामध्ये ८ कोटींची वाढ दिसत असली तरी २०१५-१६ च्या तुलनेत महसूली व भांडवली जमेत सुमारे ११ कोटी इतकी घसरण आहे. तर सन २०१४-१५ च्या तुलनेत ७ कोटी आहे. सन २०१४-१५ (३०.७५ कोटी), २०१५-१६ (३८.५७ कोटी), या महसूली व भांडवली खर्चाच्या तुलनेत अनुक्रमे आगामी वर्षातील खर्च १० कोटी व दीड कोटी इतका वाढलेला दिसतो.
आगामी वर्षात वेतनापोटी १.८० कोटी इतका खर्च अपेक्षित असून स्वच्छता व सफाई ठेक्यासाठी नगरसेवकांनी सुधारणा सुचवूनही २.२५ कोटी इतका खर्च अपेक्षित आहे. याच बरोबरीने दिवाबत्ती देखभाल, दुरु स्तीसाठी ९० लाख, जंतू नाशके फवारणीसाठी ८३ लाख, गटारे व नाले सफाईसाठी ५० लाख इतका खर्च दर्शविण्यात आला आहे.
>अशी आहेत नवी विकासकामे
विकासकामांतर्गत रस्त्यांची ५ कोटी, बगीचे नूतनीकरण १ कोटी, सांडपाणी प्रक्रिया केंद्र २० लाख, शौचालये उभारणी १५ लाख, रस्त्यावरील दिवे २.५० कोटी, अशा काही विकास कामाच्या तरतुदी हे ह्या अर्थसंकल्पाचे छोटेसे वैशिष्ट्य सांगता येईल. ह्या उलट नागरपरिषदेला मालमत्ता करातून ७ कोटी, पाणीपट्टी ३ कोटी, बाजारकार २५ लाख, इतके उत्पन्न तर अनुदानाच्या स्वरूपात १४ व वित्त आयोग ३ कोटी, दलीतवस्ती सुधारणा ३० लाख, प्राथमिक शाळा अनुदानाचे ३० लाख असा महसूल अपेक्षित आहे.