‘टीडीआर’मध्ये गुंतले अधिकारी

भूपाल शेटे : नावे जाहीर; फौजदारी संहितेखाली कारवाईची मागणी

कोल्हापूर : प्रत्यक्षात नसलेली ११,९४० चौरस मीटर जागा कागदोपत्री दाखवून कोट्यवधी रुपयांचा टीडीआर लाटून फसवणूक प्रकरणात महापालिका, महसूल, नगररचना व भूमी अभिलेख उपअधीक्षक कार्यालयातील अनेक अधिकाऱ्यांची साखळी असून, या सर्वांवर फौजदारी संहितेनुसार कारवाई करण्याची मागणी नगरसेवक भूपाल शेटे यांनी केली. याप्रकरणी माहितीसाठी नगरसेवक भूपाल शेटे यांचा राजारामपुरी पोलिसांनी बुधवारी जबाब घेतला. हा जबाब अपूर्ण असून आज, गुरुवारी पूर्ण होणार आहे. दरम्यान, या प्रकरणाशी संबंधित अधिकाऱ्यांची नावे शेटे यांनी महापालिकेत पत्रकार परिषद घेऊन जाहीर केली.
धैर्यशील पांडुरंग यादव या बांधकाम व्यावसायिकाने अधिकाऱ्यांना हाताशी धरून आठ हजार चौ.मी. जागा असताना १९,०४० चौ.मी.जागेचा टीडीआर घेतला होता. नगरसेवक भूपाल शेटे यांच्यामुळे अडीच वर्षांपूर्वी बोगस कागदपत्रांच्या आधारे टीडीआर लाटल्याचे हे प्रकरण बाहेर आले. राजकीय दबावामुळे त्यावेळी दबलेले हे प्रकरण आयुक्त पी. शिवशंकर यांनी फौजदारी दाखल करण्याची तयारी दाखविल्याने पुन्हा उजेडात आले.
या प्रकरणी शेटे यांचा पोलिसांनी बुधवारी जबाब घेतला. यावेळी तत्कालीन उपायुक्त संजय हेरवाडे, सहायक संचालक नगररचना मारुती राठोड, भूमी उपअधीक्षक सुरेश रेड्डी, शहर अभियंता नेत्रदीप सरनोबत, महापालिकेचे वकील प्रशांत चिटणीस, उपशहर अभियंता एम. एम. निर्मळे, सहायक अभियंता एस. बी. देशपांडे, कनिष्ठ अभियंता एस. एन. भाईक, आदींनी कशाप्रकारे महापालिकेची आर्थिक लूट केली याचा लेखी जबाब दिल्याचे शेटे यांनी स्पष्ट केले.
प्रत्यक्षात आठ हजार चौ.मी. जागा असताना १९,०६० चौ.मी. जागा असल्याबाबत स्थानिक वृत्तपत्रांत जाहीर नोटीस दिली. विभागीय कार्यालयातील अधिकाऱ्यांनी सुरक्षा भिंत बांधण्यासाठी येणाऱ्या खर्चाचे ८० लाख रुपयांऐवजी फक्त ७,६८,८०८ रुपये भरून घेत ना हरकत प्रमाणपत्र दिले. त्यानंतर राठोड यांनी करवीर तहसीलदारांना लेखी पत्राद्वारे या जागेवर मनपाचे नाव लावण्याची विनंती केली. शहानिशा न करताच दोन हजार चौरस मीटर जागेचा सात-बारा महापालिकेला दिला.


टीडीआरचा मुद्दा विधानसभेत
कोल्हापूर : महापालिकेने शहरातील २०३ जमिनींचे गेल्या पंधरा वर्षांत टीडीआर (हस्तांतरण विकसित हक्क) अदा केले आहेत. महापालिक ा अधिकाऱ्यांच्या उदासीन कार्यक्षमतेमुळे त्यातील अनेक प्रकरणांत कोट्यवधी रुपयांचा घोळ झाल्याचा संशय आहे. त्यातील अनेक प्रकरणांची पोलिसांत तक्रार केली आहे. महापालिकेने आतापर्यंत दिलेल्या सर्व टीडीआर प्रकरणांची माहिती आमदार चंद्रदीप नरके यांनी बुधवारी विधानसभेत औचित्यांच्या मुद्द्यांआधारे मागितली. विकास आराखड्यानुसार आरक्षित जागांचा अधिकाऱ्यांनी प्रत्यक्ष जागेवर पडताळणी केलेली नाही. कागदोपत्री जादा जागा दाखवून आर्थिक नुकसान करण्यात महसूल, भूमी अभिलेख कार्यालय, महापालिका व नगररचना विभागातील अधिकारी गुंतले आहेत. या सर्व प्रकरणांची चौकशी करून कारवाईची मागणी नरके यांनी केली आहे.

पुरावे गोळा करण्याचे काम सुरू
आरक्षित क्रीडांगणाची दोन एकर जागा दाखवून पाच एकरांचा टीडीआर घेतल्याप्रकरणी राजारामपुरी पोलिसांत धैर्यशील पांडुरंग यादव (रा. एमएलजी शाळेजवळ, भवानी मंडप) या संशयितावर गुन्हा दाखल झाला आहे. याप्रकरणी दोघांचे जबाब घेतले आहेत. साक्षीदार नगरसेवक भूपाल शेटे यांचा बुधवारी जबाब घेण्यात आला. तो अपुरा असून आज, गुरुवारी पुन्हा घेण्यात येणार आहे. याप्रकरणी महत्त्वाची कागदपत्रे, जबाब व पुरावे गोळा करण्याचे काम सुरू आहे, अशी माहिती पोलीस निरीक्षक अमृत देशमुख यांनी दिली.