नालासोपारा : शाळेचा पहिला दिवस संस्मरणीय करण्यासाठी विविध उपक्रम राबवले जातात. काही पालक मुलांना पहिल्या दिवशी नवीन कंपास, डबा, पेन देऊन त्यांचा उत्साह वाढवतात. मात्र, वसईत राहणाऱ्या रेयांश भोईर या मुलाच्या शाळेत झालेल्या रॉयल प्रवेशाची वसईत चर्चा आहे. गोखिवरेच्या विद्याविकासिनी शाळेत १२ जूनला शाळेच्या पहिल्याच दिवशी ज्युनिअर केजीच्या वर्गात जाणारा रेयांश हा महागड्या रोल्स राइस कारमधून गेला आणि अनेक जण पाहतच राहिले. जिल्हा परिषद शाळेत शिक्षक असलेले रेयांशचे वडील नवीत भोईर यांनी २० हजार रुपये मोजून काही तासांसाठी ही कार आणली होती. मुलांसाठी पालक काहीही करतात आणि हौसेला मोल नसते, याचीच प्रचिती या घटनेतून आली.
कामण खिंडीपाडा येथे राहणारे नवीत हे शिक्षक आहेत. ते खिंडीपाडा जिल्हा परिषद शाळेत चौथीपर्यंत विद्यार्थ्यांना शिकवतात. २०१५ मध्ये त्यांचा शुभांगी यांच्याशी विवाह झाला. मात्र, अनेक वर्षांनंतरही त्यांना मूलबाळ नव्हते. २०२१ मध्ये रेयांशचा जन्म झाला. त्यावेळीसुद्धा रेयांश एक महिना हाॅस्पिटलमध्ये अतिदक्षता विभागात होता. घरात सर्वांचा तो लाडका आहे. रेयांशला गोखिवरे येथील विद्याविकासिनी शाळेत दाखल केले आहे. त्याचा शाळेतील पहिला दिवस आगळावेगळा व्हावा, या हेतूने नवीत यांनी मुलाला रोल्स राइस या महागड्या कारमधून पहिल्या दिवशी शाळेत न्यायचे ठरवले. त्यासाठी काही तासांसाठी कार भाड्याने घेतली. कार फुलांनी सजवून ते वाजतगाजत शाळेत गेले.