NEET - सुप्रीम कोर्टाच्या निर्णयामुळे विद्यार्थी व पालक हैराण
By Admin | Updated: April 29, 2016 17:07 IST2016-04-29T17:07:14+5:302016-04-29T17:07:14+5:30
या निर्णयाविरोधात राज्यातल्या समस्त विद्यार्थी व पालक वर्गाने नाराजी व्यक्त केली आहे.
NEET - सुप्रीम कोर्टाच्या निर्णयामुळे विद्यार्थी व पालक हैराण
मुंबई, दि. 29 - मेडिकलसाठी NEET हीच सामाईक परीक्षा असेल आणि 1 मे रोजी ठरल्याप्रमाणे ही परीक्षा पार पडेल असा निर्णय सुप्रीम कोर्टाने फेरविचार याचिकेची सुनावणीदरम्यान दिला आहे. या निर्णयाविरोधात राज्यातल्या समस्त विद्यार्थी व पालक वर्गाने नाराजी व्यक्त केली आहे.
राज्याच्या सीईटीसाठी असलेला अभ्यासक्रम व नीटसाठी असलेला अभ्यासक्रम यामध्ये तफावत असल्यामुळे महाराष्ट्रातल्या विद्यार्थ्यांचे अतोनात नुकसान होणार असल्याची भावना एका पालकाने लोकमतशी बोलताना व्यक्त केली आहे.
महाराष्ट्र, आंध्र प्रदेश व कर्नाटकमधील लाखो विद्यार्थ्यांना या निर्णयाचा फटका बसणार आहे.
तर, राज्यातल्या साडेचार लाख विद्यार्थ्यांनी 5 मे च्या राज्याच्या सीईटीसाठी तयारी केलेली असल्यामुळे ही परीक्षा ठरल्याप्रमाणे होणार असे काल वैद्यकीय शिक्षण विभागाचे संचालक प्रवीण शिनगारे यांनी सांगितले होते.
राज्याची सीईटी व नीट दोन्ही स्वतंत्र आहेत का, दोन्ही होऊ शकतात का, की नीट असेल तर राज्याची सीईटी घेता येणार नाही, असे अनेक प्रश्न उपस्थित झाले असून शालेय शिक्षण मंत्री विनोद तावडे, संध्याकाळी पत्रकार परिषद घेऊन सर्व गोष्टींचा खुलासा करतिल असे सांगण्यात येत आहे.
