Supriya Sule: आगामी महापालिका, स्थानिक निवडणुकांच्या पार्श्वभूमीवर एकीकडे ठाकरे बंधू एकत्र येण्याबाबत बरीच मोठी चर्चा राजकीय वर्तुळात सुरू असून, दुसरीकडे काका-पुतण्या एकत्र येण्याबाबतही अनेक कयास बांधले जात आहेत. दोन्ही राष्ट्रवादीतील नेते, पदाधिकारी, कार्यकर्ते अजित पवार आणि शरद पवार यांच्या एकत्र येण्याबाबत आशावादी आहेत. राष्ट्रवादी काँग्रेस पक्षाच्या वर्धापन दिनानिमित्त दोन्ही गटाकडून कार्यक्रमांचे आयोजन करण्यात आले आहे. याच पार्श्वभूमीवर अजित पवार यांच्यासोबत जाण्याच्या चर्चांवर सुप्रिया सुळे यांनी सूचक शब्दांत दिलेले उत्तर चर्चेचा विषय ठरत आहे. ठाकरे बंधू येण्याच्या चर्चांसह काका-पुतणे एकत्र येण्याच्या चर्चांनीही जोर धरलेला पाहायला मिळत आहे.
हा माझा निर्णय नाही. हा पक्षाचा निर्णय आहे. कुठल्याही सशक्त लोकशाहीमध्ये आणि त्यातच शरद पवार यांच्या कामांची पद्धत तुम्ही सर्वांनी सहा दशके पाहिली आहे. शरद पवार जो काही निर्णय घेतात किंवा जे काही मार्गदर्शन करतात ते लोकशाही पद्धतीनेच होते. त्यामुळे जो पक्षाचा निर्णय असेल तो निर्णय पक्षाच्या शेवटच्या कार्यकर्त्यांना विश्वासात घेऊन आणि कार्यकर्त्यांच्या मनात जे असेल तोच निर्णय पक्ष घेईल. आम्ही कोणताही निर्णय वैयक्तिक घेत नाहीत, असे सुप्रिया सुळे यांनी काही दिवसांपूर्वी सांगितले होते. यानंतर आता वर्धापन दिनानिमित्त आयोजित कार्यक्रमात सहभागी होताना सुप्रिया सुळे यांनी पुन्हा एकदा यावर भाष्य केले आहे.
अजित पवारांसोबत जाण्याबाबत सुप्रिया सुळेंचे मोठे विधान
अजित पवारांसोबत जाण्याचा निर्णय घेण्यासाठी कालमर्यादा नाही. त्याची काही निश्चित वेळ ठरलेली नाही. माझ्यासाठी कार्यकर्त्यांच्या भावना सर्वात महत्त्वाच्या आहेत. मी आत्ताच भारतात आले आहे. १४ दिवस परदेशात होते. त्यानंतर दोन दिवस दिल्लीत होते. त्यामुळे माझ्यापर्यंत अशी कुठलीही चर्चा आलेली नाही, असे सुप्रिया सुळे यांनी म्हटले आहे. राष्ट्रवादी काँग्रेस पक्ष फुटून दोन गट तयार झाले आहेत. हे दोन्ही गट आज त्यांचा २६ वा वर्धापन दिन साजरा करत आहेत.
दरम्यान, एका बाजूला पक्ष एकत्रित येण्याबाबत चर्चा सुरू असताना सुप्रिया सुळे यांनी ठेवलेल्या व्हॉट्सअ‍ॅप स्टेटसची बरीच चर्चा होऊ लागली आहे. “आपली बाजू कितीही खरी असली तरी आपल्यावर अन्याय होतो त्यावेळी आपण काहीच करू शकत नाही”, असे सुप्रिया सुळे यांनी त्यांच्या स्टेटसमध्ये म्हटले आहे. यावरही सुप्रिया सुळे यांनी प्रतिक्रिया दिली. ते माझे वयक्तिक आहे. माझ्या आईने मला सल्ला दिला तो मी माझ्या व्हॉट्सअ‍ॅप स्टेट्सला ठेवला, असे सुप्रिया सुळे यांनी स्पष्ट केले.