नाशिक : पतंग उडविण्यासाठी वापरण्यात येणारा नायलॉन मांजामुळे पक्षी व प्राण्यांच्या जिवीतास धोका पोहोचत असल्याने शासनाने विक्रीवर बंदी घातलेली असतानाही सर्रास या मांजाची विक्री करणा-या विक्रे त्यावर शहर गुन्हे शाखेच्या युनिट एकने छापा टाकला़ सराफ बाजारातील तांबोळी वाड्यात टाकण्यात आलेल्या या ठिकाणाहून एक लाख रुपयांचा मांजा जप्त केला असून संशयित राजेंद्र तांबोळी या विक्रेताविरोधात गुन्हा दाखल करण्यात आला आहे़
जानेवारी महिन्यातील मकर संक्रातीचा सण काही दिवसांवर येऊन ठेपला आहे़ संक्रातीनिमित्त बालगोपाळ मोठ्या संख्येने पतंग उडवितात़ यावेळी आपली पतंग कटू नये यासाठी नायलॉन मांजाचा मोठ्या प्रमाणात वापर केला जातो़ मात्र, पशूपक्ष्यांसाठी जीवघेणा ठरत असलेल्या या नायलॉन मांजाची निर्मिती व विक्रीस महाराष्ट्र शासनाने बंदी घातली आहे़ मात्र, असे असले तरी तरी नायलॉन मांजाची चोरीछुप्या पद्धतीने मोठ्या प्रमाणात विक्री केली जाते़ शहर गुन्हे शाखेच्या युनिट एकचे सहाय्यक पोलीस उपनिरीक्षक जाकीर शेख यांना सराफ बाजारात नायलॉन मांजाची विक्री सुरू असल्याची माहिती मिळाली होती़
वरीष्ठ पोलीस निरीक्षक आनंद वाघ यांनी या माहितीची सत्यता पडताळून पाहिल्यानंतर सराफ बाजारातील तांबोळी वाड्यात सापळा रचून छापा टाकण्यात आला़ या ठिकाणी संशयित राजेंद्र सदाशिव तांबोळी यांचे तांबोळी पूजा-भांडाराचे दुकान असून येथूनच नायलॉन मांजाची विक्री सुरू होती. पोलिसांनी या ठिकाणाहून एक लाख६५० रुपये किमतीचे २११ नायलॉन मांजा गुंडाळलेले गट्टू जप्त केले. याप्रकरणी सरकारवाडा पोलीस ठाण्यात तांबोळी विरोधात गुन्हा दाखल करण्यात आला आहे.