सतर्कतेमुळे फसला प्रेयसीच्या हत्येचा कट

प्रेमभंगाचा घाव भरलेलाही नव्हता इतक्यात प्रेयसीने केलेली बलात्काराची तक्रार, त्यावरून पोलिसांनी केलेली अटक,

मुंबई : प्रेमभंगाचा घाव भरलेलाही नव्हता इतक्यात प्रेयसीने केलेली बलात्काराची तक्रार, त्यावरून पोलिसांनी केलेली अटक, जामीन मिळविण्यासाठी करावी लागलेली केविलवाणी धडपड आणि अखेरीस झालेली बदनामी या दुष्टचक्राने एका सॉफ्टवेअर इंजिनिअरला गुन्हेगारीच्या उंबरठ्यावर उभे केले. आयुष्य उद्ध्वस्त करणारी प्रेयसी आणि तिच्या वडिलांची हत्या करण्याच्या इराद्याने त्याला वेडेपीसे केले. याच वेडाच्या भरात तो मध्य प्रदेशातून शस्त्रसाठा घेऊन मुंबईला आला खरा, मात्र सतर्क मालवणी पोलिसांनी त्याला वेळीच गजाआड केले. अमित जैन (३१) असे या आरोपी तरुणाचे नाव असून तो मूळचा मध्य प्रदेशचा. २००५ मध्ये बी.ई.चा अभ्यासक्रम पूर्ण केल्यानंतर तो मुंबईत आला. येथे त्याने एमबीएची पदवी घेतली. अभ्यास पूर्ण केल्यानंतर तो एका खासगी बँकेत सॉफ्टवेअर इंजिनिअर म्हणून नोकरीला लागला. याच दरम्यान एका तरुणीशी त्याची ओळख झाली आणि ओळखीचे रूपांतर प्रेमात झाले. ही तरुणी त्याच्या नात्यातच होती. काही काळाने त्यांच्या शरीरसंबंध निर्माण झाले. २०१२मध्ये या दोघांमधील संबंध बिघडले. वाद झाला आणि दोघांनी स्वतंत्र होण्याचा निर्णय घेतला. मात्र यानंतर तरुणीने अमितविरोधात बलात्काराची तक्रार पश्चिम उपनगरातील एका पोलीस ठाण्यात केली. त्यानुसार पोलिसांनी बलात्काराचा गुन्हा नोंदवून अमितला गजाआड केले. सप्टेंबर २०१२ ते जानेवारी २०१३ या काळात अमित ठाणे कारागृहात बंद होता. जामिनासाठी त्याची धडपड सुरूच होती. जानेवारी २०१३मध्येच तो जामिनावर सुटला. कारागृहातच तो सुडाने पेटला होता. बाहेर पडताच प्रेयसी व तिच्या वडिलांची हत्या करून बदला घ्यायचा हा विचार त्याने मनोमन पक्का केला होता. त्यासाठी आधी त्याने प्रेयसीला गाठण्याचा प्रयत्न केला. मात्र पोलीस तक्रार केल्यानंतर पालकांनी घर बदलल्याने ती त्याच्या हाती लागत नव्हती. मुंबई, मध्य प्रदेशात त्याने जंग पछाडले. अखेर काही दिवसांपूर्वी या तरूणीचा पत्ता त्याला मिळाला. खात्री केल्यानंतर अमित तात्काळ मध्य प्रदेशला रवाना झाला. ८८ हजार रूपये खर्च करून त्याने दोन गावठी पिस्तूल आणि तब्बल २० जिवंत काडतुसे विकत घेतली. हा शस्त्रसाठा घेऊन तो मुंबईत परतला. इथे आल्यानंतर त्याने प्रेयसीची इत्थंभूत माहिती काढली. त्यानुसार शुक्रवारी त्याने मालवणी पोलीस ठाण्याच्या हद्दीतील मार्वेरोड परिसर हत्येसाठी निवडला. तेथे तो दबा धरून बसला. (प्रतिनिधी)