मुंबई: मनसे अध्यक्ष राज ठाकरे यांना देण्यात आलेल्या धमकीवरून राज्यातील राजकारण तापताना दिसत आहे. राज ठाकरे यांना झेड प्लस सुरक्षा देण्याचा विचार सुरू असल्याचे सांगितले जात आहे. मनसे नेते बाळा नांदगावकर यांनीही राज्याचे गृहमंत्री दिलीप वळसे-पाटील यांची यासंदर्भात भेट घेतली होती. मात्र, यावरून शिवसेना नेते आणि खासदार संजय राऊत यांनी राज ठाकरे यांच्यावर खोचक शब्दांत टीका केली आहे. या टीकेला मनसेकडून प्रत्युत्तर देण्यात आले आहे.
राज ठाकरे यांनी लागोपाठ घेतलेल्या सभांनंतर शिवसेना आणि मनसेत हिंदुत्वाच्या मुद्द्यांवरून आरोप-प्रत्यारोप तीव्र व्हायला लागल्याचे पाहायला मिळत आहे. यातच आता मनसेचे प्रवक्ते योगेश चिले यांनी संजय राऊत यांनी केलेल्या टीकेवर पलटवार करत, त्यांना डिवचण्याचा प्रयत्न केला आहे.
कोणी धमकी द्यावी एवढही त्यांचं कर्तृत्व नाही
योगेश चिले यांनी एक ट्विट केले असून, यातून संजय राऊत यांच्यावर निशाणा साधला आहे. संजय राऊत चिरकूट माणूस... त्यांना मुंगीही धमकी देणार नाही... कोणी धमकी द्यावी एवढही त्यांच कर्तृत्व नाही..., अशी बोचरी टीका योगेश चिले यांनी केली आहे. धमकीची अशी शेकडो पत्र शिवसेना भवनात रोज येत असतात. महाराष्ट्रात कुणाच्या केसालाही धक्का लागणार नाही. त्यामुळे स्टंटबाजी सोडा आणि लोकांच्या प्रश्नांवर बोला, असा खोचक टोला संजय राऊत यांनी राज ठाकरे यांना लगावला.
दरम्यान, मनसे नेते बाळा नांदगावकर यांच्या कार्यालयात एक धमकीचे पत्र आले असून यात बाळा नांदगावकर आणि राज ठाकरे यांना जीवे मारण्याची धमकी देण्यात आली आहे. यासंदर्भात बाळा नांदगावकर यांनी राज्याचे गृहमंत्री दिलीप वळसे पाटील यांची भेट घेऊन संबंधित पत्र त्यांच्या सुपूर्द केले होते. त्यानंतर बाळा नांदगावकर यांनी प्रसारमाध्यमांना संबंधित विषयाची सविस्तर माहिती दिली. मशिदीवरील भोंग्यांच्या प्रश्नावरुन तुम्ही सुरू केलेले आंदोलन थांबवा नाहीतर तुम्हाला जीवानिशी मारले जाईल आणि तुमच्या राज ठाकरेंनाही सोडणार नाही, अशी धमकी पत्रातून देण्यात आल्याची माहिती बाळा नांदगावकर यांनी दिली होती.