छत्रपती संभाजीनगर - Manoj Jarange Patil ( Marathi News ) मी भोगायला, लढायला तयार आहे. जेलमधून बाहेर आलो तरी सरकारकडून आरक्षण घेणारच. बाकीच्यांना आरक्षण दिले मग मराठ्यांना आरक्षण द्या. नेते तुमच्यासोबत असतील परंतु मराठ्यांचे कार्यकर्ते माझ्यासोबत आहेत. कितीही नेते फुटले तरी त्यांना मराठाविरोधी ठरवलं आहे. तुमच्या नेत्याला जातीसाठी बोललोय. नेता नेता करत बरळलायला लागलंय. मी दवाखान्यात असल्याने मराठा समाज चिंतेत आहे. मला अस्वस्थ बघून मराठा समाजाला सहन होणार नाही. मी जातीवादी नाही. नेत्याचा ठेका आम्ही घेतला नाही असा निशाणा मनोज जरांगे पाटील यांनी सरकारवर साधला आहे.
मनोज जरांगे पाटील म्हणाले की, इंग्रजांनीही केली नसेल इतकी भयंकर दडपशाही, जातीय द्वेष सरकार आणि गृहमंत्री फडणवीस करतंय. सोशल मीडियात मराठा समाजाबद्दल खुन्नस दाखवली जातेय. मी मराठा समाजासाठी भांडतोय. त्यात गोरगरिब, कष्टकरी, श्रीमंत सर्वच मराठ्यांसाठी भांडलोय. मी बोललो नेत्याला पण मराठा समाजातील नेत्यांना राग आलाय. गोरगरीब मराठ्यांनी मतदान केल्याने तुम्ही नेते झालात. आज सर्व मराठा आमदारांनी जातीकडून बोलायला हवे. सरकारनं फसवणूक केली, नेत्याने विश्वासघात केला म्हणून मी बोलतोय.पण तुम्ही त्या नेत्याला बोलण्याऐवजी मला बोलताय असा आरोप जरांगेंनी केला.
तसेच अंतरवाली सराटी इथं गावकऱ्यांवर सुरु असलेली दडपशाही बंद करा. मराठा समाजाने राष्ट्रपती, पंतप्रधान, राज्यपाल आणि मुख्यमंत्री यांना ईमेल करून मराठा समाजावर सुरू असलेली दडपशाही थांबवा, सगेसोयरेची अंमलबजावणी करा अशी मागणी करा. कोट्यवधी ईमेल गेले पाहिजेत. आपण शांततेत सर्व करायचे. मी हटत नाही. मी घाबरत नाही. ओबीसीतून मराठ्यांना आरक्षण दिल्याशिवाय मी शांत बसणार नाही. जेलमध्ये टाकून सरकारने मला सडवलं तरीही मागे हटणार नाही असा इशारा मनोज जरांगे पाटील यांनी दिली आहे.
दरम्यान मला अटक केले तरी जेलमध्ये आमरण उपोषण करेन. तडफडून मरायला तयार आहे पण मागे हटायला तयार नाही. सरकार वारंवार आश्वासन देतंय पण ते पूर्ण करत नाही. सरकारने प्रमाणपत्रे वाटप करणे बंद केले आहे. जाणुनबुजून हायकोर्टाची तारीख अगोदर घेतली. शांततेत आंदोलन करूनही गुन्हे दाखल केलेत. १० टक्के आरक्षण ज्यांना घ्यायचे आहे त्यांनी घ्यावे परंतु राज्यातील मराठा समाजाची मागणी ओबीसीतून आरक्षणाची आहे. ते घेतल्याशिवाय मागे हटणार नाही. मराठा समाजाने चलबिचल करू नका. शांत राहून मज्जा बघा. सरकार किती दिवस दडपशाही करतंय पाहू असं त्यांनी म्हटलं.
सरकारनं नाराजीची लाट अंगावर घेऊ नका
मराठ्यांनी एकजूट फुटू देऊ नका. स्वाभिमानाने मरायला तयार आहे. हटायला तयार नाही. मला अटक केली तरी शांततेत आंदोलन करा. एकजुटीची ताकद आहे. सरकारने आरक्षण द्यावेच लागेल. ७-८ दिवस शांततेत राहा. काय काय सुरू आहे ते बघा. गृहमंत्री काय षडयंत्र करतोय, अंतरवालीत काय दडपण सुरू आहे हे सर्व पाहा. सगळ्यांनी ईमेल करायला सुरुवात करा. माझी शेवटची विनंती आहे. गृहमंत्री जाणुनबुजून हे करतायेत. अंतरवाली सराटीतील लोकांना अटक करणे बंद करा. रडका खेळ गृहमंत्र्यांनी खेळू नये मराठ्यांच्या सहनशीलतेचे अंत बघू नका. नाराजीची लाट अंगावर घेऊ नका. सगेसोयऱ्यांची अंमलबजावणी करा अजून संधी गेली नाही असं मनोज जरांगे पाटलांनी म्हटलं.
मराठा समाज शांतपणे बघतोय
षडयंत्र रचणे, ट्रॅप रचणे..शांततेत आंदोलन झाले मग गुन्हे दाखल का केले? १० टक्के आरक्षण घेण्यासाठी दडपण का आणताय? मला सगेसोयरेच आरक्षण हवंय. मी शेतकऱ्याचं पोरगं आहे. लेकरं मोठं व्हायला हवं म्हणून लढतोय. मला अटक करायला मी इतकं काय केले? माझ्यावर गुन्हे दाखल करताय, तुमच्यावरही मराठे गुन्हे दाखल करणार आहेत. मराठा शांत बसला नाही. तुम्ही काय काय करताय हे बघतोय असंही जरांगे म्हणाले.