निष्ठावंतांना डावलून विधान परिषदेवर बाहेरचेच

विधान परिषदेवर राज्यपाल नियुक्त सदस्य पाठविताना निष्ठावंतांना डावलून दुसऱ्या पक्षातून आलेल्यांनाच आमदारकी दिल्याने निष्ठावंतांमध्ये नाराजी दिसून येते.

मुंबई : विधान परिषदेवर राज्यपाल नियुक्त सदस्य पाठविताना निष्ठावंतांना डावलून दुसऱ्या पक्षातून आलेल्यांनाच आमदारकी दिल्याने निष्ठावंतांमध्ये नाराजी दिसून येते.
काँग्रेसच्या ४ आणि राष्ट्रवादीच्या ६ अशा एकूण १० जणांची राज्यपाल नियुक्त सदस्य म्हणून विधान परिषदेवर वर्णी लागली. राष्ट्रवादी काँग्रेसकडून आमदारकी मिळालेले राहुल नार्वेकर आधी शिवसेनेत होते. लोकसभा निवडणुकीच्या काही दिवस अगोदर त्यांनी राष्ट्रवादीत प्रवेश केला. मावळ मतदारसंघातून त्यांनी निवडणूक लढविली, मात्र त्यांचा दारुण पराभव झाला. त्यांच्या गळ्यात आमदारकीची माळ पडली आहे. रामराजे निंबाळकर यांचे ते जावई आहेत. नागपूरचे प्रकाश गजभिये हे रामदास आठवले यांच्या रिपाइंमध्ये होते. २००९ची विधानसभा निवडणूक त्यांनी अपक्ष लढविली होती. सध्या ते राष्ट्रवादीच्या मागासवर्गीय सेलचे अध्यक्ष आहेत. त्यांना आमदारकीची बक्षिसी देऊन इंदू मिलच्या जागेवर डॉ. आंबेडकर यांचे स्मारक व्हावे, यासाठी संघर्ष करणारे विजय कांबळे यांच्यावर अन्याय झाल्याची भावना आहे. राष्ट्रवादी महिला काँग्रेसच्या प्रदेशाध्यक्ष विद्या चव्हाण यांना पुन्हा आमदारकी मिळाली. पूर्वी त्या जनता दलाच्या कार्यकर्त्या होत्या. काँग्रेसमध्येही निष्ठावंतांना डावलल्याची भावना आहे. काँग्रेसकडून वर्णी लागलेले सोलापुरातील रामहरी रुपनवर पूर्वी भाजपामध्ये होते. (विशेष प्रतिनिधी)