पुणे : लोकमततर्फे एनईसीसी व लेक्झिकॉन ग्रुप ऑफ इन्स्टिट्यूट्स यांच्या सहकार्याने लोकमत वुमेन समीटचे आठवे पर्व पुण्यात मंगळवारी (दि. २३) आयोजिण्यात आले आहे. सावित्रीबाई फुलेंना महिलांच्या शिक्षणासाठी सहन करावे लागलेले दगडांचे घाव ते आज लोकसभेतील ७८ महिला खासदार येथपर्यंतचा नेतृत्वाचा प्रवास (लिव्ह टू लीड) या संकल्पनेतून उलगडणार आहे. विधान परिषदेच्या उपसभापती डॉ. नीलम गोऱ्हे, महाराष्ट्र महिला आयोग आणि भारतीय जनता पक्ष महिला मोर्चाच्या राष्ट्रीय अध्यक्षा विजया रहाटकर, ग्रॅव्हिट्स फाउंडेशनच्या अध्यक्षा उषा काकडे यांच्या उपस्थितीत परिषदेचे उद्घाटन होणार आहे. लोकमत एडिटोरियल बोर्डाचे चेअरमन विजय दर्डा अध्यक्षस्थानी असतील. परिषदेला प्रसिद्ध अभिनेत्री तापसी पन्नू, राजश्री देशपांडे, सौंदर्या शर्मा, जल आणि शाश्वत विकासच्या तज्ज्ञ रुपाली देशमुख, पर्यटन आणि सांस्कृतिक कार्य विभागाच्या सचिव विनीता सिंघल, लेक्झिकॉन स्कूल्सच्या संचालिका डॉ. मोनिषा शर्मा, सिम्बायोसिसच्या संचालक स्वाती मुजुमदार, तृतीयपंथीयांसाठी लढणाऱ्या कार्यकर्त्या गौरी सावंत, सामाजिक कार्यकर्त्या तृप्ती देसाई, ऐश्वर्या तमाईचीकर, उद्योजिका सुजाता चॅटर्जी, श्रद्धा शर्मा, प्रसिद्ध वेडिंग डेकोर डिझायनर गुरलीन पुरी उपस्थित राहणार आहेत.
* महिलांच्या अभिव्यक्तीला व्यासपीठ मिळवून देण्यासाठी लोकमत सखी मंचाची स्थापना झाली. सर्वच क्षेत्रांतील महिलांच्या नेतृत्वावर लोकमत वुमेन समीटमध्ये सातत्याने चर्चा होते. महिला नेतृत्वाला सलाम करण्यासाठीच या वर्षीच्या वुमेन समीटची संकल्पना लिव्ह टू लीड अशी आहे. देशपातळीवर यावर चर्चा घडविण्यात यंदाची लोकमत वुमेन समीट महत्त्वाची भूमिका बजावेल, असा मला विश्वास आहे. - विजय दर्डा, चेअरमन, लोकमत एडिटोरियल बोर्ड
............
* अर्थमंत्री निर्मला सीतारामन यांनी ‘नारी तू नारायणी’ अशी घोषणा अर्थसंकल्पीय भाषणात केली आहे. एक समिती नेमून देशाचा विकास आणि ग्रामीण अर्थव्यवस्थेत महिलांना भागीदार बनविण्यासाठी ही समिती काम करणार आहे. लोकमत वुमेन समीटमधील चर्चा यासाठी उपयुक्त ठरणार आहे. - उषा काकडे, अध्यक्ष, ग्रॅव्हिट्स फाउंडेशन