इक्बाल कासकर अटक प्रकरण, आव्हाड पोलीस आयुक्तांच्या भेटीला

बिल्डरकडून खंडणी घेतल्याप्रकरणी अटकेत असलेला कुख्यात डॉन दाऊद इब्राहिमचा भाऊ इक्बाल कासकरच्या पोलीस चौकशीत ठाण्यातील काही नगरसेवक आणि काही नेत्यांची नावे समोर आल्याच्या पार्श्वभूमीवर राष्ट्रवादीचे आमदार जितेंद्र आव्हाड यांनी गुरुवारी ठाण्याचे पोलीस आयुक्त परमवीर सिंग यांची भेट घेतली.

ठाणे : बिल्डरकडून खंडणी घेतल्याप्रकरणी अटकेत असलेला कुख्यात डॉन दाऊद इब्राहिमचा भाऊ इक्बाल कासकरच्या पोलीस चौकशीत ठाण्यातील काही नगरसेवक आणि काही नेत्यांची नावे समोर आल्याच्या पार्श्वभूमीवर राष्ट्रवादीचे आमदार जितेंद्र आव्हाड यांनी गुरुवारी ठाण्याचे पोलीस आयुक्त परमवीर सिंग यांची भेट घेतली. त्या वेळी तुमचे यात कुणीही नाव घेतले नसल्याचा खुलासा आयुक्तांनी केल्याचे समजते.इक्बाल कासकरला खंडणीप्रकरणी अटक केल्यानंतर या प्रकरणात ठाण्यातील काही नगरसेवक आणि काही नेत्यांचा सहभाग समोर येत असल्याचे पोलीस आयुक्त परमवीर सिंग यांनी जाहीर केले होते. काही वृत्तवाहिन्यांनी ठाण्यातील राष्टÑवादीच्या एका नेत्याचा तसेच आमदार जितेंद्र आव्हाड यांच्या निकटवर्तीयांचा यात सहभाग असल्याचे वृत्त दिल्याने सोशल मीडियावर उलटसुलट चर्चा सुरू झाली. याच पार्श्वभूमीवर आव्हाड यांनी गुरुवारी पोलीस आयुक्तांची भेट घेतली. त्यावेळी तुमचे यात कुणीही नाव घेतले नसल्याचे परमबीर सिंग यांनी आव्हाडांना सांगितले. इक्बालच्या अटकेवर पोलीस आयुक्त परमबीर सिंग आणि त्यांच्या पथकाचे आव्हाड यांनी अभिनंदन केल्याचे सांगण्यात आले.दरम्यान, दाऊद इब्राहिमशी आपले काही वर्षांपूर्वी बोलणे झाले. सध्या आपण त्याच्या संपर्कात नसल्याचा दावा इक्बाल कासकर याने पोलीस चौकशीत केला आहे. ठाणे-मुंबईतील आणखी कोणाकोणाकडे इक्बाल किंवा दाऊदच्या गँगने खंडणीची मागणी केली? ती कशाच्या स्वरूपात आहे? या टोळीमध्ये आणखी किती जण सक्रिय आहेत? यात स्थानिक पातळीवरील आणि दाऊदप्रमाणे परदेशातील आणखी कुणाचा समावेश आहे का? याबाबत स्वत: पोलीस आयुक्त परमवीर सिंग, गुन्हे अन्वेषण विभागाचे पोलीस उपायुक्त अभिषेक त्रिमुखे आणि खंडणीविरोधी पथकाचे वरिष्ठ पोलीस निरीक्षक प्रदीप शर्मा यांच्याकडून चौकशी सुरू आहे. दाऊद आणि इक्बाल यांच्यात फोनद्वारे वारंवार संवाद झाल्याचा पोलिसांना संशय आहे. परंतु, ‘व्हीओआयपी’द्वारे (व्हाइस ओव्हर इंटरनेट प्रोटोकॉल) हा संपर्क झाल्याची शक्यता असल्यामुळे बाहेरील कॉलही स्थानिक असल्याचे आढळून येते. त्यामुळे पुरावे मिळवताना पोलिसांना अनेक अडचणींना तोंड द्यावे लागत आहे. या टोळीमध्ये मुंबई, ठाण्यातील अनेक जण सहभागी असल्याची माहिती पोलीस तपासात उघड होत आहे.इकबाल हा कोकेनपासून अनेक अमली पदार्थांच्या आहारी गेलेला आहे. याच कारणामुळे दाऊदची आपल्यावर नाराजी आहे. याच नाराजीमुळे दोघांमध्ये गेल्या काही महिन्यांमध्ये फोनवर किंवा प्रत्यक्ष बोलणे झाले नसल्याचा दावा त्याने पोलिसांकडे केला.>दाऊद टोळीतील काही गुंडांची माहिती इक्बालकडून तपास पथकाला मिळाली आहे. त्यामुळे मुंबई परिसरातून आणखी तीन ते चार जणांना लवकरच ताब्यात घेण्यात येईल, असेही अभिषेक त्रिमुखे यांनी सांगितले.