माळीणला शिकागोतून दहा हजार डॉलरची मदत

माळीण दुर्घटनेतून बचावलेल्या कुटुंबांसाठी लायन्स क्लब इंटरनॅशनल फाउंडेशन शिकागो यांनी दहा हजार डॉलर म्हणजेच साडेसहा लाख रुपयांची मदत माळीण दुर्घटनाग्रस्त गावासाठी दिली आहे.

घोडेगाव : माळीण दुर्घटनेतून बचावलेल्या कुटुंबांसाठी लायन्स क्लब इंटरनॅशनल फाउंडेशन शिकागो यांनी दहा हजार डॉलर म्हणजेच साडेसहा लाख रुपयांची मदत माळीण दुर्घटनाग्रस्त गावासाठी दिली आहे. या पैशातून माळीण आपत्तिग्रस्तांसाठी माहेरचा आहेर म्हणून सर्व संसारोपयोगी साहित्य देण्यात आले आहे. 

माळीण दुर्घटना घडल्याबरोबर येथे लायन्स क्लब ऑफ शिवनेरी जुन्नरचे सदस्य डॉ. सदानंद राऊत, संदीप मुथा, जितेंद्र गुंजाळ व इतर सदस्यांनी भेट दिली. ही भीषण दुर्घटना पाहून त्यांनी लायन्स क्लबचे डिस्ट्रीक्ट गव्हर्नर डॉ. विक्रांत जाधव यांना कळवली. यांच्यामार्फत अमेरिकेमधील शिकागो येथील लायन्स क्लबच्या कार्यालयात कळविण्यात आली व तत्काळ मदतीची मागणी करण्यात आली. 

 या मदतीचा विनियोग कसा करावा, याबाबत लायन्स क्लब ऑफ शिवनेरी जुन्नरच्या सदस्यांनी विधानसभा अध्यक्ष दिलीप वळसे-पाटील यांची भेट घेतली व त्यांच्या सल्ल्यानुसार माळीण दुर्घटनेतून बचावलेल्या लोकांसाठी घरात लागेल असे सर्व संसारोपयोगी साहित्य देण्याचा निर्णय घेतला.   

हा वाटप कार्यक्रम आसाणो आo्रमशाळेत तहसीलदार बी. जी. गोरे, डॉ. विक्रांत जाधव, डॉ. सदानंद राऊत यांच्या उपस्थित वाटप करण्यात आले. या प्रसंगी लायन्स क्लब ऑफ शिवनेरी जुन्नरचे अध्यक्ष संदीप मुथा, जितेंद्र गुंजाळ, शिरीष जठार, विवेक मुळे, डॉ. विलास नायकोडी, डॉ. सुभाष जुन्नरकर, लायन्स क्लबचे सर्व सदस्य उपस्थित होते. माळीणचे दिलीप लेंभेनी आभार मानले. (वार्ताहर)