दुरुस्तीसाठी वरसावे पुलावर अवजड वाहनांना १३ ते १५ नोव्हेंबर दरम्यान बंदी

मुंबई अहमदाबाद महामार्गा वरील वरसावे खाडीवरच्या जुन्या पुलाच्या दुरुस्तीसाठी अवजड वाहनांना १३ नोव्हेम्बरच्या मध्यरात्री नंतर  ते १५ नोव्हेम्बरच्या रात्री ११ . ५५ पर्यंत प्रवेश बंदी घालण्यात आली आहे .  

लोकमत न्यूज नेटवर्क 

मीरारोड - मुंबई अहमदाबाद महामार्गा वरील वरसावे खाडीवरच्या जुन्या पुलाच्या दुरुस्तीसाठी अवजड वाहनांना १३ नोव्हेम्बरच्या मध्यरात्री नंतर  ते १५ नोव्हेम्बरच्या रात्री ११ . ५५ पर्यंत प्रवेश बंदी घालण्यात आली आहे .  

वरसावे येथील जुन्या पुलाचा वापर हा वसई - गुजरातच्या दिशेने जाण्यासाठी केला जातो . परंतु सदर पूल हा खूपच जुना व जीर्ण झाला असून सुरक्षीततेच्या दृष्टीने आता तातडीची दुरुस्ती आवश्यक असल्याने त्यासाठी ३० ऑक्टोबर ते १ नोव्हेंबर दरम्यान जुन्या पुलावरून अवजड वाहतूक बंद करण्याची अधिसूचना मीरा भाईंदर - वसई विरार पोलीस आयुक्तालयाचे परिमंडळ १ चे उपायुक्त अमित काळे यांनी जरी केली होती . परंतु ठाणे वाहतूक पोलीस उपायुक्तांनी पत्र पाठवून दिवाळीत मुंबई - नाशिक महामार्गावर मोठ्या प्रमाणात अवजड वाहनांची असलेली वाहतूक आणि डायव्हर्शन रस्त्याच्या डागडुजूची कामे बाकी असल्याने दिवाळी नंतर बंदीचा निर्णय घेण्यास कळवले होते . त्या अनुषंगाने ती अधिसूचना रद्द केली होती . 

आता उपायुक्त काळे यांनी वरसावे पुलाच्या दुरुस्तीच्या अनुषंगाने नव्याने अधिसूचना जारी केली आहे . त्या नुसार १३ ते १५ च्या मध्यरात्री पर्यंत असे तीन दिवस जुन्या पुलावरून अवजड वाहनांना प्रवेश बंदी केली आहे . 

जुन्या पुलावरून दोन पैकी एकाच मार्गिकेवरून लहान वाहनांची वाहतूक सुरु ठेवली जाणार आहे . त्यामुळे वाहतुकीची कोंडी होणार आहे . बॅरेकेटिंग लावून सलग तीन दिवस पुलाची एकच मार्गिका हलक्या वाहनांसाठी असणार असल्याने ठाणे येथून पालघर, गुजरात कडे जाणारी जड अवजड वाहने ही वरसावे पुलावरून न जाता अन्य  पर्यायी मार्गावरुन केली जाणार आहे. 

ठाणे शहरातून वर्सोवा मार्गे पालघर सुरत बाजूकडे जाणारी जड-अवजड वाहने ही मुंब्रा - खारेगाव टोलनाका – मानकोली – भिवंडी- वाडा – मनोर – पालघर – मार्गे जातील. दुसऱ्या पर्याय हा मुंब्रा – खारेगाव टोलनाका – मानकोली – भिंवडी – नदी नाका – अंबाडी – वज्रेश्वरी – गणेशपूरी – शिरसाट फाटा मार्गे जातील. तर मुंब्रा – खारेगाव टोलनाका – मानकोली – अंजूर फाटा – कामण-चिंचोटी – वसई विरार महानगरपालिका हद्दी मार्गे जातील. 

यातून महसूल विभागाची वाहने, पोलीस वाहने, अग्निशमन दलाची वाहने, रुग्णवाहिका व इतर अत्यावश्यक सेवेतील वाहनांना ह्या बंदीतून सवलत देण्यात आली आहे . या दिवसात वरसावे पूल आणि परिसरातील महामार्गावर होणारी वाहतुकीची कोंडी लक्षात घेता या मार्गावरून अनावश्यक कारणा शिवाय प्रवास टाळण्याचे आवाहन पोलिसांनी केले आहे . पर्यटक आणि बाहेरगावी जाणाऱ्यांनी देखील याची नोंद घ्यावी असे म्हटले आहे .