गोपीनाथ मुंडे तारीख बदलणारे नव्हे तर इतिहास घडवणारे नेते - मुख्यमंत्री

बीड, दि. 11 - 'मुंडेसाहेब तारीख बदलणारे नव्हते, इतिहास बदलणारे होते', असं सांगत मुख्यमंत्री देवेंद्र फडणवीस यांनी अजित पवारांचा दावा फेटाळून लावला आहे. 'गोपीनाथ मुंडेंचा वाढदिवस 12 डिसेंबर नाही, पवारांचं वलय पाहून तारीख त्यांनी ठरवली', असा गौप्यस्फोट राष्ट्रवादी नेते अजित पवार यांनी केला होता. 'गोपीनाथ मुंडेंना आपला मूळ वाढदिवस माहित नव्हता, अशी माहिती खुद्द धनंजय मुंडेंनी दिली', असंही अजित पवार यांनी सांगितलं होतं. एबीपी माझा कट्टावर बोलताना त्यांनी हा गौप्यस्फोट केला होता. 

 

 

इतकंच नाही तर गोपीनाथ मुंडे पंकजा आणि चार आमदारांसोबत भाजपा सोडण्याच्या तयारीत होते असाही गौप्यस्फोट अजित पवारांनी केला होता. 'गोपीनाथ मुंडे काँग्रेसमध्ये प्रवेशाच्या विचारात होते, मात्र सुषमा स्वराज यांनी थांबवलं', असं अजित पवार बोलले . 'तसंच ज्यावेळी धनंजय मुंडे पक्ष सोडून राष्ट्रवादीत प्रवेश करण्याच्या विचारात होते तेव्हा काही घटना घडतात, मुंडेंना सोडू नका, असा सल्ला मीच धनंजय मुंडेंना दिला होता', असंही अजित पवार बोलले.