लिफ्टच्या दरवाजामध्ये अडकून तरुणीचा मृत्यू

पुढल्या आठवड्यात निकाह असल्याने मेहंदीची आॅर्डर देण्यास घराबाहेर पडलेल्या २३ वर्षीय तरुणीचा लिफ्टमध्ये चिरडून मृत्यू झाला.

मुंबई : पुढल्या आठवड्यात निकाह असल्याने मेहंदीची आॅर्डर देण्यास घराबाहेर पडलेल्या २३ वर्षीय तरुणीचा लिफ्टमध्ये चिरडून मृत्यू झाला. हा अपघात रविवारी रात्री मालाड पूर्वेकडील पठाणवाडीतल्या अल-मुजाल्फा इमारतीत घडला.
अपघातात मृत्यू झालेली आलिया आरिफ वराडीया आपल्या पठाणवाडीतल्या हुमेरा इमारतीत राहत होती. लग्न तोंडावर आल्याने मेहंदीची आॅर्डर देण्यास काल रात्री ती आईसोबत घराबाहेर पडली. शेजारील इमारतीतल्या चौथ्या मजल्यावरील एका घरात मेहंदीची आॅर्डर देऊन परतत असताना तिने लिफ्ट थांबवली. लिफ्ट आॅटोमॅटिक असल्याने दार उघडताच मागाहून येणाऱ्या आईला आत घेता यावे यासाठी आलिया दरवाजात मधोमध उभी राहिली. आईची वाट पाहात असतानाच लिफ्टचे दार अचानक बंद झाले. दोन्ही बाजूंनी बंद होणाऱ्या दरवाजात आलिया मधोमध अडकली. तशाच अवस्थेत लिफ्टने तळमजला गाठला. यात आलिया चार माळे फरफटत खाली गेली. कुटुंबीय व इमारतीतल्या रहिवाशांनी आलियाला दरवाजातून कसेबसे बाहेर काढले. जवळच्या हयात रुग्णालयात दाखल केले. मात्र तेथे उपचारांपूर्वीच आलियाला मृत घोषित करण्यात आले, अशी माहिती कुरार पोलीस ठाण्याचे वरिष्ठ निरीक्षक जयचंद्र काथे यांनी ‘लोकमत’ला दिली. या प्रकरणी पोलिसांनी अपघाती मृत्यूची नोंद केली आहे.

आलियाचे वडील आरिफ यांचे गोरेगावच्या एका मॉलमध्ये मोबाइलचे दुकान आहे, तर तिची आई गृहिणी असून त्यांना आलिया व्यतिरिक्त दोन मुले आणि मुली आहेत. पुढच्याच आठवड्यात आलियाचे लग्न होते. संपूर्ण कुटुंब उत्साहात लग्नाची तयारी करत होते. घरी लग्नाची लगबग सुरू होती, अशातच आलियाचा मृत्यू झाला आणि क्षणात हे कुटुंब शोककळेत बुडाले.

तिला वाचवू शकलो नाही !
आलिया अडकली तेव्हा लिफ्टमध्ये अल-मुजाल्फा इमारतीत राहणाऱ्या दोन व्यक्ती हजर होत्या. ‘आम्ही तिला लिफ्टमध्ये ओढण्याचा प्रयत्न केला, मात्र ती पूर्णपणे अडकली होती. त्यामुळे तिला वेदनेने ओरडताना पाहण्याव्यतिरिक्त दुसरा पर्याय नव्हता,’ असे त्यांनी पोलिसांना सांगितले.