‘त्या’ तरुणीची झाली हत्या; पोलिसांकडे पुरावे

चारकोपमधील छत्रपती शिवाजी राजे संकुलात राहणाऱ्या सिम्मी मिस्त्री(२०) या तरुणीची शेजारील इमारतीच्या १५व्या मजल्यावरून ढकलून हत्या करण्यात आली

मुंबई : चारकोपमधील छत्रपती शिवाजी राजे संकुलात राहणाऱ्या सिम्मी मिस्त्री(२०) या तरुणीची शेजारील इमारतीच्या १५व्या मजल्यावरून ढकलून हत्या करण्यात आली हे स्पष्ट करणारे पुरावे पोलिसांच्या हाती लागले आहेत. त्यावरून पोलिसांनी सिम्मीची हत्या झाल्याचा गुन्हा नोंदवून त्याप्रकरणी कन्हैया सिंग या २३ वर्षीय तरूणाला गजाआड केले आहे.
बीपीओमध्ये काम करणाऱ्या सिम्मीचा मृतदेह कांदिवलीच्या न्यू म्हाडा कॉलनीतील इमारत क्रमांक ५६च्या आवारात २५ मे रोजी पहाटे सहाच्या सुमारास आढळला. घटनास्थळी पोहोचलेल्या चारकोप पोलिसांनी सुरूवातीला अपघाती मृत्यूची नोंद केली. प्राथमिक चौकशीतून पोलिसांनी ही आत्महत्या असल्याचा अंदाज वर्तवला. मात्र सिम्मीचे वडील शंभुप्रसाद यांनी हा अंदाज खोटा ठरवला. . अखेर त्यांनी आपल्या मुलीच्या मृत्यूचे गूढ उकलण्यासाठी स्वत:हूनच तपास सुरू केला. ज्या इमारतीच्या आवारात ही घटना घडली तेथे सीसीटीव्ही नव्हते. अन्य इमारतीचे सीसीटीव्ही त्यांनी तपासले. त्यात घटनेच्या दहा मिनिटांपुर्वी सीम्मी व कन्हैया सोबत असल्याचे या सीसीटीव्ही चित्रणातून स्पष्ट झाले. इतकेच नव्हे तर दोघांच्या हातवाऱ्यांवरून त्यांच्यात वाद सुरू होता, असेही दिसले. हे चित्रण शंभुप्रसाद यांनी पोलिसांसमोर ठेवले आणि या घटनेने वळण घेतले. पोलिसांनीही हे चित्रण पाहून लागलीच कन्हैयाला ताब्यात घेतले. त्याच्याविरोधात हत्येचा गुन्हा नोंदवून तपास सुरू केला.
न्यायालयाने आरोपी कन्हैयाला ५ जूनपर्यंत पोलीस कोठडीत धाडले आहे. चौकशीत मृत्यूपुर्वी सीम्मीसोबत होतो, त्रिवेणी सोसायटीच्या १५व्या मजल्यावरही गेलो होतो. मात्र मी तिला ढकलले नाही. उलट तिनेच आत्महत्या केली असावी, असे त्याने पोलिसांना सांगितल्याचे समजते. (प्रतिनिधी)