रायगड, दि. 25 - गणेशोत्सवाच्या पहिल्याच दिवशी दुखःद घटना समोर आली आहे. रायगड जिल्ह्यामध्ये एकाच कुटुंबातील तीन जणांचा मृत्यू झाल्याची धक्कादायक घटना घडली आहे. या घटनेमुळे रायगड जिल्ह्यावर शोककळा पसरली आहे.
रायगडमधील पाली तालुक्यातील मजरे जांभूळपाडा गावात आज सकाळी सहाच्या सुमारास ही दुख:द घटना घडली आहे. एकाच कुटुंबातील तिघांचा विजेच्या धक्क्याने मृत्यू झाला. तारेवरील टॉवेल काढताना शॉक लागून तिघांचा मृत्यू झाला. यात एका महिलेचाही समावेश आहे. मृत्यामध्ये बाजीराव मालुसरे (६५), सचिन मालुसरे (३३) आणि निकिता दळवी (२३) यांचा समावेश आहे. पोलिस निरिक्षक दशरथ पाटील यांनी याबाबतच्या वृत्ताची माहिती दिली. पोलिसांनी या घटनेची आकस्माद मृत्यू म्हणून नोंद केली आहे.
गणेशोत्सवाच्या तयारीसाठी लवकर उठून अंघोळीसाठी निघालेले बाजीराव मालुसरे हे तारेवरील टॉवेल काढत असताना त्यांना विजेचा धक्का बसला. त्यांना वाचवण्यासाठी त्यांचा मुलगा सचिन गेला असता तोही त्यांना चिकटून राहिला. त्यानंतर बाजीराव यांची नात निकीता पुढे आली असता तिलाही विजेचा धक्का बसला. यात तिघांचाही मृत्यू झाला.