रामदास बोडखेंविरूद्ध गुन्हा दाखल

बेहिशेबी मालमत्ता प्रकरण

अकोला: बेहिशोबी मालमत्ताप्रकरणी माजी रोजगार हमी योजना राज्यमंत्री रामदास बोडखे यांच्यासह त्यांची सहा मुलं आणि भावाविरूद्ध लाचलुचपत प्रतिबंधक विभागाने (एसीबी) मंगळवारी गुन्हा दाखल केला. १९९९ ते २00४ या कालावधीत आमदार रामदास बोडखे हे अकोला जिल्ह्यातील आकोट विधानसभा मतदारसंघाचे आमदार होते. ते भारिप-बहुजन महासंघाच्या तिकीटावर निवडून आले होते. २00१ साली माजी मुख्यमंत्री स्व. विलासराव देशमुख यांच्या कार्यकाळात त्यांनी काँग्रेसमध्ये प्रवेश घेतला. काँग्रेसने त्यांना रोजगार हमी योजनेचे राज्यमंत्री पद बहाल केले. त्या कालावधीत विविध प्रकारचा अपहार करून बोडखे यांनी ३0 लाख ३४ हजार १५८ रुपयांची बेहिशोबी मालमत्ता जमवल्याची तक्रार आकोट नगरपालिकेचे माजी नगराध्यक्ष पुरूषोत्तम चौखंडे यांनी १२ वर्षांपूर्वी एसीबीकडे केली होती. या तक्रारीच्या आधारे एसीबीने तपास केला. तपासामध्ये बोडखे यांनी त्यांच्या एकूण मिळकतीपेक्षा जास्त रकमेची मालमत्ता जमवल्याचे निष्पन्न झाले. बोडखे यांनी अपहारातून लाखो रुपयांची संपत्ती गोळा करून, ती त्यांची सहा मुलं व भावाच्या नावे केल्याचेही तपासामध्ये स्पष्ट झाले. त्यामुळे रामदास बोडखे यांच्यासह त्यांची सहा मुले व भावाविरुद्ध कलम १३(१) ई सह १३(२) लाचलुचपत प्रतिबंधक कायदा १९८८ तसेच भादंविचे कलम १0९ अन्वये आकोट पोलिसांनी गुन्हा दाखल केला. लाचलुचपत प्रतिबंधक विभागाचे पोलिस उपअधीक्षक उत्तमराव जाधव यांच्या तक्रारीवरून ही कारवाई करण्यात आली.

** बंगल्याची झडती

माजी राज्यमंत्री रामदास बोडखे, त्यांची मुलं तसेच भावाविरुद्ध गुन्हा दाखल केल्यानंतर लाचलुचपत प्रतिबंधक विभागाच्या अधिकार्‍यांनी बोडखे यांच्या आकोटमधील बंगल्याची झडती घेतली. रात्री उशिरापर्यंत झडती घेण्याचे काम सुरूच होते. एसीबी अधिकार्‍यांकडून बोडखे यांच्या शैक्षणिक संस्था तसेच संपत्तीशी संबंधित कागदपत्रांची तपासणी सुरू होती.

** सहा मुलं आणि भावाविरुद्धही गुन्हा दाखल

माजी राज्यमंत्री रामदास बोडखे यांनी लाखो रुपयांची मालमत्ता खरेदी करून, ती त्यांची सहा मुलं माजी नगराध्यक्ष संजय बोडखे, विजय, दीपक, प्रमोद, मनोज, प्रवीण आणि भाऊ देवीदास बोडखे यांच्या नावे केली. त्यामुळे एसीबीने या सर्वांविरुद्धही गुन्हा दाखल केला.