एफडी घोटाळा हजार कोटींचा!

राज्य शासनाच्या महामंडळांव्यतिरिक्त दलालांच्या टोळीने काही बड्या कंपन्या आणि संस्थांना मुदत ठेव (एफडी) घोटाळ्यात फसविले असून, या घोटाळ्याची व्याप्ती वाढत आहे. किमान १ हजार कोटी

- यदु जोशी,  मुंबई
राज्य शासनाच्या महामंडळांव्यतिरिक्त दलालांच्या टोळीने काही बड्या कंपन्या आणि संस्थांना मुदत ठेव (एफडी) घोटाळ्यात फसविले असून, या घोटाळ्याची व्याप्ती वाढत आहे. किमान १ हजार कोटी रुपयांहून अधिकच्या ठेवींतून ३०० कोटी रुपयांचा अपहार झाल्याचे समोर आले आहे. या देशव्यापी घोटाळ्यात बँकांचे अधिकारीही सामील असून, आतापर्यंत १४ जणांना अटक झाली
आहे.
शासकीय महामंडळाच्या एफडीतील घोटाळ्याचे हे प्रकरण ‘लोकमत’ने १२ जानेवारीच्या अंकात उजेडात आणले होते. त्याची व्याप्ती केवळ महामंडळापुरतीच मर्यादित नसून खासगी कंपन्या, संस्था आणि व्यक्तींनाही जबर आर्थिक फटका बसला आहे. सध्या ६३७ कोटी रुपयांच्या मुदत ठेवींची माहिती समोर आली असली तरी मुंबई, दिल्लीत याव्यतिरिक्त काही प्रकरणांत आणखी ३५० कोटी रुपयांची गुंतवणूक झाल्याचे म्हटले जाते.
रक्कम बुडाल्यात जमा!
आतापर्यंत हाती आलेल्या माहितीनुसार, कंपन्यांनी मुदत ठेवींमध्ये जे ६३७ कोटी ५० लाख रुपये गुंतवले. त्यातील २०१ कोटी रुपये ओव्हरड्राफ्टच्या स्वरूपात दलालांनी अन्यत्र वळते केल्याचा मुंबई पोलिसांचा कयास असून, ही रक्कम नेमकी गेली कुठे, याचा तपास केला जात आहे. त्यामुळे हे (पान ६ वर)

असा झाला घोटाळा
विविध महामंडळाच्या व खासगी कंपन्यांच्या अधिकाऱ्यांना दलालामार्फत आकर्षक ठेवींचे आमिष दाखवून त्यांच्याकडील रक्कम बँकांमध्ये मुदत ठेवींच्या स्वरूपात गुंतवली गेली.
एफडीच्या बनावट पावत्या तयार करून कंपन्यांना दिल्या गेल्या. मूळ पावत्यांवर कंपन्यांचे सही, शिक्के वापरून भलत्याच लोकांची नावे टाकली गेली.
बँकांचे ओव्हरड्राफ्ट अकाउंट (ओडी अकाउंट) त्याच बँकेत काढले आणि त्यावर बाहेरील खासगी व्यक्तींना ओव्हर ड्राफ्ट सुविधा मिळवून दिली गेली. या व्यवहारात कोट्यवधी रुपये गिळंकृत करण्यात आले असून, बँक अधिकाऱ्यांच्या संगनमताने, काही कंपन्या, संस्थांच्या पदाधिकाऱ्यांना हाताशी धरून कोट्यवधी रुपयांची फसवणूक करणारे रॅकेट वर्षानुवर्षे चालले होते.

मुख्य सूत्रधार गजाआड
मुख्य सूत्रधार मोहम्मद फसिउद्दिन, विमल बारोट, धनलक्ष्मी बँकेची शाखा व्यवस्थापक अमृता मॅथ्यूज, अनुपम ठाकूर, बँकांचे वित्तीय सल्लागार वा प्रतिनिधी असल्याचा बनाव करणारे अनिल पवार, रॉय जोसेफ थॉमस, अविनाश खंडाळे आणि बँक आॅफ इंडियाच्या कळंबोली शाखा व्यवस्थापक प्रभाकर डिंगणकर सध्या गजाआड आहेत.